थापालाई उधृतगर्दै अनलाइनखबर लेख्छ नाकाबन्दी नखुल्दासम्म भारत भ्रमणमा जानु वाञ्छनीय नहुने प्रधानमान्त्री ओली आफैंले सार्वजनिक अभिव्यक्ति दिइसकेकाले वीरगञ्ज नाका सहज नभई उहाँ भारत जानुहुन्न ।
गत मंगलबार बालुवाटारमा आयोजित सम्पादकहरुसँगको भेटघाट कार्यक्रममा प्रधानमन्त्री ओलीले नाका सहज नभएसम्म भारत नजाने स्पष्ट पारेका थिए ।
एमाले नेता थापाका अनुसार भारतसँगै चीनले पनि एकै दिन भ्रमणको निम्तो दिएको हुनाले भारतभन्दा पहिले प्रधानमन्त्रीले चीन भ्रमण गर्ने सम्भावना छ ।
थापाले भने- ‘चिनियाँ राजदूत असोज २४ गते फूलको गुच्छा लिएर प्रधानमन्त्रीलाई बधाइ दिन जाँदा नै चीन भ्रमणको निम्तो प्राप्त भएको हो । चिनियाँ राजदूत प्रधानमन्त्रीसँगै भएका बेला भारतीय प्रधानमन्त्री नरेन्द्र मोदीले फोनमार्फत् बधाइ एवं भ्रमणको निम्तो दिएका हुन् ।’
पहिले चीन जान पार्टीको सुझाव
स्रोतका अनुसार नेकपा एमालेका नेताहरुले आफ्नो पार्टीका अध्यक्षसमेत रहेका प्रधानमन्त्री ओलीलाई वीरगञ्ज नाका नखुलेको अवस्थामा भारतको भ्रमण गर्नुभन्दा चीन भ्रमण गर्न सुझाएका छन् ।
नाका सहज नभएको अवस्थामा चीन भ्रमणमा गएर प्रधानमन्त्रीले महत्वपूर्ण सम्झौताहरु गर्न उपयुक्त हुने बहस एमालेभित्र सुरु भएको छ । प्रधानमन्त्री केपी ओलीको राष्ट्रवादी छवि रहेको र नाकाबन्दी नखुलेकै अवस्थामा दिल्ली जाँदा उनीमाथि स्वदेशमा आलोचना हुन सक्ने एमाले नेताहरुले आँकलन गरेका छन् ।
पछिल्लोपटक संविधान संशोधन गरिसकेको अवस्थामा पनि वीरगञ्ज नाका नखुलेपछि यथास्थितिमा भारत जान प्रधानमन्त्रीले मन नगरेको एमाले स्रोतले बतायो ।
१७ माघ २०७२
वि.सं.२०७२ माघ १७ आइतवार १८:१६ मा प्रकाशित
