काठमाण्डौं । पशुपतिनाथ मन्दिरका मूल भट्ट र सहायक भट्टले वर्षको एक पटक घर जान आउन हवाई टिकटसहित ४० हजार रुपैयाँ पाउने भएका छन् ।
पशुपति क्षेत्र विकास कोषले भारतको बैंग्लोर घर भएका मुल भट्ट र सहायक भट्टलाई जाने आउने टिकटसहित ४० हजार भत्ता दिने भएको हो । पशुपति क्षेत्र विकास कोषको आइतबारको बैठकले वार्षिक एक पटक घर जाने मूल भट्ट र सहायक भट्टका लागि यो व्यवस्था गर्ने निर्णय गरेको कोषका अध्यक्ष तथा संस्कृति, पर्यटन तथा नागरिक उड्डयनमन्त्री आनन्दप्रसाद पोखरेलले बताए। पशुपतिनाथ मन्दिरका मूल भट्ट एक र चार सहायक भट्ट गरी पाँच भट्टलाई हवाई टिकट र घर जान र आउन लागि टिकटसहित वार्षिक ४० हजार दिने बैठकले निर्णय गरेको हो ।
यसअघि प्रति भट्ट वार्षिक ४० हजार रुपैयाँ आवतजावतका लागि दिइने गरेकोमा कोषले यसपटकबाट टिकट दिन लागेको हो। भट्टहरुले आफ्नो घर टाढा भएकाले हवाई टिकटको सुविधा पाउनुपर्ने माग गर्दै आएका थिए।
मूल भट्ट र सहायक भट्टका छोराछोरीलाई अध्ययनका लागि कोषले मासिक १० हजार छात्रवृत्तिस्वरुप प्रदान गर्ने निर्णय पनि बैठकले गरेको छ। यो छात्रवृत्ति स्कूल वा क्याम्पसको खातामा छोराछोरी २२ वर्षको हुँदासम्म मात्र उपलब्ध गराउने बैठकले निर्णय गरेको छ ।
माघ २५, २०७२, ८.००
वि.सं.२०७२ माघ २५ सोमवार १०:३७ मा प्रकाशित
