काठमाडौँ । एआइभी टेष्ट गर्ने किट सक्कली भन्दै नक्कली बेच्ने सेरोल्याव नेपाल ट्रेडस सानेपाका संचालक किरणकुमार श्रेष्ठलाई ललितपुर प्रहरीले पक्राउ गरेको छ । बजारमा एआइभी टेष्ट गर्ने किट नै नक्कली पाइन थालेपछि औषधि व्यवसायीहरुले गुनासो गरेपछि डेढ महिना लामो निगरानीपछि श्रेष्ठलाई पक्राउ गरिएको एसएसपी पीताम्बर अधिकारीले जानकारी दिए।
उनले चीनको छेन्जुुस्थित अटोवायो डाइग्नोष्टिक कम्पनीबाट एचआइभी टेष्ट गर्ने किट खरिद गरी आफ्नै कार्यालयको कम्प्युटर र कलरप्रिन्ट प्रयोग गरी एडालटिस नामको इटालियन कम्पनीको नाम र ठेगाना टाँसी मेडिकल तथा ल्यावहरुमा पठाउने गरेको अधिकारीले बताए।
श्रेष्ठले नेपाली सेनाको वीरेन्द्र सैनिक अस्पताल लगायतका अन्य अस्पतालमा पनि नक्कली किट बेच्ने गरेको प्रहरीले बताएको छ । सेनाले मिसनमा पठाउनुभन्दा पहिल्यै त्यहाँ जाने कर्मचारीको एचआइभी टेष्ट गर्छ । उनको ल्यावमा छापा मारेर प्रहरीले २१ थान किट र कम्प्युटर बरामद गरेको छ ।
आफ्नो ल्यावबाट नभइ उनले प्रेसिअस नानो सेन्टरको नाममा सेना तथा अन्य अस्पतालमा किट बेच्ने गरेको अधिकारीले बताए। वैदेशिक रोजगारीमा जानका लागि जाँच गर्ने मेडिकलहरुमा उनले सबैभन्दा बढी किट बेचेको प्रहरी अनुसन्धानबाट खुल्न आएको छ ।
नक्कली किटबाट एचआइभी टेष्ट गर्दा भएकाहरुलाइ नभएको देखाउने र नभएकाहरुलाई भएको समेत देखाएको जानकारी आफूहरुसँग आएको अधिकारीले बताए ।
‘मानवस्वास्थ्थमा उनले गम्भिर खेडवाड गरे, सुरुमा हामी उनीमाथि कालोबजारीको मुद्दा चलाउँछौं’ अधिकारीले भने । उनले चीनबाट २ हजारमा किट ल्याएर त्यसलाई इटालियन कम्पनीको हो भन्दै ६ हजार रुपैयाँसम्ममा बेच्ने गरेको प्रहरी अनुसन्धानबाट खुल्न आएको छ ।
तस्बिर, टेक्स्ट सेतोपटी / ६ फागुन २०७२
वि.सं.२०७२ फागुन ६ बिहीवार १५:४७ मा प्रकाशित
