काठमाण्डौं । राष्ट्रिय जनमोर्चाको अध्यक्षमा चित्रबहादुर केसी पुनः अध्यक्षमा निर्वाचित भएका छन्। ‘संविधान लागू गरौं, संघीयता खारेज गरौं’ भन्ने नाराका साथ शुक्रवारदेखि रुपन्देहीको बुटवलमा सुरु भएको जनमोर्चाको सम्मेलन आइतबार राति सकिएको हो।
रुपन्देहीको बुटवलमा आइतबार राति सकिएको तेस्रो राष्ट्रिय सम्मेलनले केसीलाई पुनः अध्यक्षमा सर्वसम्मत चयन गरेको हो। सम्मेलनले जनमोर्चाको कार्यकारी अध्यक्षमा रश्मीराज नेपाली, उपाध्यक्षमा बद्रे आलम र दुर्गा पौडेललाई चयन गरेको छ। यसैगरी महासचिवमा जनकराज शर्मा, सचिवमा हेमलाल पुरी, कोषाध्यक्षमा ओमबहादुर केसी चयन भएका छन्।
३१ केन्द्रीय सदस्यको निर्वाचनपछि केन्द्रीय सदस्यले पदाधिकारी निर्वाचित गरेका हुन् । सम्मेलनले ६–६ जना वैकल्पिक सदस्य र सल्लाहकार समिति पनि बनाएको छ। यस्तै सम्मेलनले दुई सय सदस्यीय राष्ट्रिय परिषद् पनि गठन गरेको छ।
१० फागनु, २०७२, ८.००
वि.सं.२०७२ फागुन १० सोमवार १०:४५ मा प्रकाशित
