बेइजिङ । अमेरिकालाई पछि पार्दै चीन धेरै अर्बपतिहरुको देश बनेको छ भने बेइजिङले पहिलो पटक अर्बपतिको संख्यामा न्युयोर्कलाई पछाडि पारेको छ ।
अहिले बेइजिङमा एकसय जना अर्बपति बस्छन् भने न्यूयोर्कमा ९५ जना अर्बपति बस्ने गरेको हालै चीनको हुरुन रिसर्च फर्मको नयाँ अध्ययनले देखाएको छ। त्यस्तै चीनकै साङ्घाई सहर धेरै अर्बपति बस्नेमा पाँचौ नम्बरमा आएको छ । हुरुन रिसर्च फर्मले पछिल्लो पाँच वर्षमा विश्वभरिमा भएका अर्बपतिहरुको सम्पत्तीको बारेमा अध्ययन गरेको थियो । अमेरिकी डलरमा उनीहरुको सम्पत्ती हिसाब गरिएको छ।
अनुसन्धान अनुसार गत एक वर्षमा बेइजिङमा ३२ जना नयाँ अर्बपति थपिए भने न्युयोर्कमा जम्मा चारजना मात्र अर्बपति थपिएका छन्। चीनमा पाँचसय ६८ जना अर्बपति भइसकेका छन् भने अमेरिकामा पाँचसय ३५ जना अर्बपति रहेका छन्। चीनभरमा यो वर्षमात्रै ९० जना नयाँ अर्बपति भएका थिए।
अर्बपतिको संख्याका आधारमा चीन अगाडि रहेपनि सम्पत्तीको आधारमा पहिलो १० जना भने अमेरिकी धेरै छन् ।
बीबीसी, १४ फागुन २०७२, १०.००
वि.सं.२०७२ फागुन १४ शुक्रवार १०:५८ मा प्रकाशित
