भक्तपुर । मुलुक भित्रै हराउँदै गएको राष्ट्रियता जगाउन र नेपाली झण्डा चिनाउनको लागि एक वृद्ध राष्ट्रिय झण्डा बोकेर हिडेको ४ महिना पुरा हुन लाग्यो ।
भक्तपुर जिल्ला भक्तपुर नगरपालिका वडा नं.१३ खौमामा वि.सं २०१३ साल फागुन ३० गते जन्मिएका लक्ष्मी नारायण शिल्पकार यो ६० वर्षको उमेर देश भित्रै देश चिनाउने महान अभियानमा लागेका छन् ।
शिल्पकारहरुको पुर्खौली पेशा काष्ठकलामा लामो समय विभिन्न कला कृति कुँदेका लक्ष्मी नारायण पछिल्लो समय नेपालीले नेपाललाई भुल्न थालेको देखेर निकै चिन्तित् भए । त्यसैले स्वदेश र विदेशमा रहेको आम नेपालीलाई नेपालीपन बारे जगाउने मनसाय राख्दै उनले सेलाएको राष्ट्रियतालाई तताउन नेपालको झण्डा बोकेर यो अभियानमा लागेको बताउँछन् ।
चन्द्र–सूर्य अङ्कित त्रिकोण आकारमा बनेको नेपालको झण्डालाई नै धेरैले राजनीतिक पार्टीको झण्डा ठान्ने मानसिकता हटाउन उनी ९ फिट आधा उचाई भएको झण्डालाई १२ फिट उचाई भएको डण्डीमा राखेर नेपालका ४६ जिल्ला पुगिसकेका छन् ।
भुकम्प र नाकाबन्दीमा परेको नेपाली मनलाई देश प्रेम जगाउने उद्देश्य लिएर २०७२ मसिंर १ गते पूर्वको ताप्लेजुङ्ग जिल्लाबाट लक्ष्मी नारायणले यो अभियान थालेको थिए । हिमाली जिल्लामा मौसको कारणले केही समय जान समस्या हुने भएकाले २०७३ बैशाखसम्ममा आफ्नो अभियान सक्ने तयारीमा रहेको लक्ष्मीनारायणले बताए ।
साना साना झण्डाको स्टिकर बनाएर उनी यो अभियानमा भेट भएका प्रायः सबैलाई बाढ्ने समेत गर्दछन् ।
आफ्नो स्वविबेकले थालेको उनको यो अभियानमा धेरै नेपालीले माया गरेकोमा आफु निकै हर्षित भएको उनले कुराकानीको क्रममा बताए ।
मैले आजसम्म यो अभियान मेरै खर्चले थालेको हुँ, आशा छ अब बाकीँ जिल्ला पनि म यसरी नै पुग्न सक्नेछु, लक्ष्मी नारायणले भने ।
सडक सञ्जाल भएका जिल्लामा यातायातका साधनबाट र नभएका जिल्लाहरुमा पैदल नै अभियान गर्ने गरेको उनले जानकारी दिए ।
सबै जिल्लाका सदरमुकाममा आफु पुगेका र अब पनि बाकीँ जिल्लाहरुमा विगतमा जसरी नै पुग्ने लक्ष्मी नारायणको तयारी रहेको छ ।
युवा शक्ति कामको खोजीमा विदेशिने क्रमले गाउँघर शुन्य र खेतबारी बाझोँ भएको देख्दा आफुलाई नरमाइलो लागेको उनले बताए ।
“मैले आफ्नो सन्तान बाहेक अरुसंग नगद सहयोग मागेको छैन्, कसैले दिन चाहे मैले भन्ने गरेको छु तपाईकोमा जे पाक्छ मलाई त्यही खुवाउनु होस” भन्ने गरेको उनले हामीलाई बताए ।
यो अभियानमा विभिन्न जिल्लाका सञ्चारकर्मीले उनलाई गरेको सहयोग भने प्रशंसा गर्न लाएक रहेको समेत उनले बताए ।
दुई छोरा र एक छोरीका पिता लक्ष्मी नारायाणलाई उनको जिवनसंगीले भने ८ वर्ष अगाडी छोडेर स्वर्गवास भइन् ।
“मेरो यो कार्य मेरा सन्तानहरुलाई मन परेको छ उनीहरुले मलाई खर्च नपुग्दा फोन गरेपछि सम्बन्धित स्थानमा पठाइदिने व्यवस्था गरेका छन्” उनले भने ।
१९ फागुन २०७२ / ६:३०:३३
वि.सं.२०७२ फागुन १९ बुधवार १९:१८ मा प्रकाशित
