काठमाण्डौं । नेपाली कांग्रेसको आजबाट सुरु भएको १३ औं महाधिवेशनका लागि संस्थापन पक्षका दुई प्यानल सहित तीन जना शेरबहादुर देउवा, राचन्द्र पौडेल र कृष्णप्रसाद सिटौलाले सभापति पदका लागि आफ्नो उम्मेदवारी दिँदै प्यानल घोषणा गरेका छन् ।
आज घोषणा गरिएको शेरबहादुर देउवाको प्यानलमा महामन्त्रीमा अर्जुननरसिंह केसी र कोषध्यक्षमा चीत्रलेखा यादवलाई उम्मेदवार बनाइएको छ । कुलबहादुर गुरुङ र खुमबहादुर खड्काले शेरबहादुर देउवालाई सभापतिमा प्रस्ताव गरेका हुन् ।
त्यस्तै हिजै घोषणा गरिएको रामचन्द्र पौडेलको प्यानलमा महामन्त्रीमा शशांक कोइराला रहेका छन् । महामन्त्री प्रकाशमान सिंहको प्रस्ताव र केन्द्रीय सदस्य रामशरण महतको समर्थनमा पौडेलले प्यानलको औपचारिक घोषणा गरेका थिए ।
यसैगरी हिजै कृष्णप्रसाद सिटौलाले सभापति पदका लागि आफ्नो उम्मेदवारी सहित प्यानल घोषणा गरेका थिए । उनको प्यानलमा महामन्त्रीमा गगन थापा र कोषाध्यक्षमा उमाकान्त चौधरी सहितको प्यानल घोषणा गरिएको छ । योसँगै गगन थापा आफ्नै ससुरा अर्जुननरसिंह केसी सित सोही पदका दाबेदार भएका छन् ।
हिजो सभापति पदका लागि आफ्नो उम्मेदवारी दिएकी सुजाता कोइरालाले भने रामचन्द्र पौडेललाई समर्थन दिँदै आफ्नो उम्मेदवारी फिर्ता लिएकी छिन् ।
२० फागुन २०७२, ११.००
वि.सं.२०७२ फागुन २० बिहीवार १२:१४ मा प्रकाशित
