बीबीसी, वासिङ्गटन । अल कायदाका नेता ओसामा बिन लादेनले मृत्युअघि लेखेको इच्छापत्रमा करिब ३ करोड डलर परिवारका नाममा छाडेको खुलेको छ । लादेन अमेरिकी सेनाद्वारा पाकिस्तानको एबोटावादमा मारिएका थिए । उक्त कारबाहीका क्रममा बरामद इच्छापत्रसहितका विभिन्न दस्तावेजहरू नेसशनल इन्टलिजेन्स निर्देशकको कार्यालयले सार्वजनिक गरेको हो ।
१९९० को दशकमा उनले लेखेको इच्छापत्रमा भनिएको छ, ‘मेरो इच्छाको पालना गर्नू र यो पैसा जिहादका लागि खर्च गर्नू ।’
लादेनले आफ्नो २ करोड ९० लाख डलरको सम्पत्ति सुडानमा भएको बताएका छन् । तर, यो नगदका रूपमा छ, अन्य रूपमा भने खुलेको छैन । उक्त सम्पत्ति उनका हकवालालाई प्राप्त भए–नभएको पनि स्पष्ट भएको छैन । सन् १९९० को दशकमा ५ वर्षसम्म उनी सुडान सरकारको अतिथिका रूपमा रहेका थिए ।
अर्को एक पत्रमा लादेनले आफ्नो मृत्यु भएमा पत्नी र बच्चाहरूको हेरविचार गर्न पितासँग आग्रह गरेका छन् । २००८ मा लेखेको पत्रमा उनले भनेका छन्, ‘यदि म मारिएँ भने मेरा लागि धेरै प्रार्थना गर्नू र धेरै पैसा दान गरिदिनू ।’
आफ्नो पत्रमा लादेनले पश्चिमी देशले चलाएको ‘आतंकवादविरुद्धको युद्ध’ र अफगानिस्तानमा अमेरिकी सैन्य अभियानका बारेमा पनि उल्लेख गरेका छन् ।
उनले पत्रमा भनेका छन्, ‘सोचेको थिएँ युद्ध सहज हुनेछ र केही दिन या केही सातामै लक्ष्य हासिल हुनेछ ।’ तर, अझै संयम र धैर्यका साथ अगाडि बढे जित आफूहरूकै हुने उनले पत्रका उल्लेख गरेका थिए ।
प्रकाशितः २०७२ फाल्गुन २०
वि.सं.२०७२ फागुन २० बिहीवार १२:१५ मा प्रकाशित
