काठमाडौं। पाशुपत क्षेत्रमा अहिले साधु सन्तको उपस्थिति निकै बाक्लो भएको छ ।
भोली सोमबार शिवरात्रि परेकाले देश तथा विदेशबाट आएका साधु, जोगी बाबाजी लगायत आउने क्रम जारी छ । शिवरात्रिमा मेला भर्न भारतका दिल्ली, हरियाणा, पन्जाब, वृन्दावन लगायत स्थानबाट साधुसन्त आइरहेका छन् ।
बिगु बाबा समेत शिवरात्रिमा सहभागी हुन नेपाल आउनुहुने पशुपति क्षेत्र विकास कोषले जनाएको छ । स्वामी अभियानन्द र ९३ वर्षीय भीमा शङ्कर ‘गदुर बाबा’समेत आईपुगेका छन् ।
सोमबार विहानसम्म पनि साधुसन्त आउने बताइएको छ । गत वर्ष सात हजार साधु सन्त आएकामा यस वर्ष पाँच हजार आउने अनुमान कोषले गरेको छ । साधु सन्त व्यवस्थापनका लागि रु ११ लाख कोषले विनियोजन गरेको छ ।
अन्नपूर्ण आश्रममा नागा बाबालाई खान बस्नको व्यवस्था मिलाइएको छ । स्वर्गद्वारीमा सन्न्यासी, तिलगङ्गामा सामान्य जोगी तथा सन्तलाई खान बस्नको व्यवस्था गरिएको कोषको सदस्यसचिव डा।गोविन्द टण्डनले जानकारी दिए । कोषले देशविदेशबाट आएका साधुको तह निर्धारण गरी बसोबास तथा बिदाइका बेला रु १०० देखि पाँच हजारसम्म दक्षिणाको व्यवस्था मिलाएको छ ।
कोषले यस वर्ष शिवरात्रिमा ११ लाख भक्तजनले दर्शन गर्ने अनुमान गरेको छ । त्यसका लागि विभिन्न चार दिशाबाट दर्शनका लागि पङ्क्ति व्यवस्थापन काम भइरहेको छ ।
वनकाली आसपास नै भारतको अमरनाथ तीर्थस्थलको प्रारुप तयार गरी अवलोकन गराइने छ । दुई वर्षअघि सोही क्षेत्रमा जम्मुकास्मिरस्थित वैष्णोदेवीको मन्दिरको प्रारुप बनाइएको थियो । आजै पाशुपत क्षेत्रस्थित वनकाली मन्दिर परिसरमा १८ फि अग्लो र आठ फि चौडा गणेशको मूर्ति आज अनावरण गरिएको छ ।
प्रकाशितः २०७२ फाल्गुन २३
वि.सं.२०७२ फागुन २३ आइतवार १७:२१ मा प्रकाशित
