चितवन । जिल्लामा गत वर्ष बीउबाट दुई अर्ब ५९ करोड १० लाख रुपैयाँ आम्दानी भएको छ । गत वर्ष विभिन्न खाद्यान्न बालीको पाँच हजार ५१ मेट्रिक टन धान, मकै, गहुँ, तोरी, मुसुरो, राज्मा, बोडी, भटमासको बीउ उत्पादन भएको थियो ।
जिल्ला कृषि विकास कार्यालयका प्र्रमुख सोमनाथ घिमिरेले बीउ उत्पादनका लागि किसानलाई प्रोत्साहनका कार्यक्रम गरिएकाले उत्पादन बढ्दै गएको बताए । गत आवमा जिल्लामा तीन हजार २८४ हेक्टरमा बीउ उत्पादनका लागि खेती गरिएको थियो ।
एक हजार ५०० हेक्टरमा दुई हजार ५०० मेट्रिक टन धानको बीउ उत्पादन भई एक अर्ब, १२ करोड, ५० लाख रुपैयाँ आम्दानी भएको थियो । यस्तै एक हजार ७३० मेट्रिक टन बीउ उत्पादन हुँदा ८६ करोड ५० लाख रुपैयाँ आम्दानी भएको घिमिरेले जानकारी दिए ।
यसैगरी मकैबाट ३० करोड, मुसुरोबाट १४ करोड, राज्माबाट साढे सात करोड, तोरीबाट सात करोड २० लाख र बोडीबाट डेढ करोड आम्दानी भएको थियो । जिल्लामा ५० प्रतिशत अनुदानमा बीउ वितरण गरिएको हो ।
“उन्नत बीउ उत्पादनका लागि मेसिन समेत वितरण गरेका थियौँ” प्रमुख घिमिरेले भने। रासस
२८ फागुन २०७२, ८.००
वि.सं.२०७२ फागुन २८ शुक्रवार ११:२२ मा प्रकाशित
