काठमाडौं । साना किसान विकास बैंक १६ औं बर्षमा प्रवेश गरेको छ । यस अवधिमा बैंकको अधिकृत तथा जारी पुँजी ६४ करोड र चुक्तापुँजी ४० करोड २४ लाख ४९ हजार ८०० रहेको छ ।
स्थापनाकाल देखिनै मुनाफामा सञ्चालित यस बैंकले आर्थिक वर्ष ०७१/७२ मा १५ करोड ४१ लाख खुद नाफा गर्न सफल भएकोमा चालु आ.ब.को ६ महिनाको अवधिमा नै १० करोड ३९ लाख खुद मुनाफा आर्जन गरेको बैंकले जनाएको छ ।
चुक्ता पुँजी मध्ये साना किसान सहकारी संस्थाहरुको सबैभन्दा बढी अर्थात ३९ प्रतिशत रहेको छ भने सर्वसाधारणको ३० प्रतिशत, कृषि विकास बैंकको २२ प्रतिशत, नेपाल बैंक लि.को ६ प्रतिशत र नबिल बैंक लि.को ३ प्रतिशत स्वामित्व रहेको बैंकले जनाएको छ ।
२०७२ साल पौष मसान्तमा यस बैंकको कुल सम्पत्ति ९ अर्ब ८७ करोड पुगेको छ ।
दुग्ध तथा मासुजन्य पदार्थको आपूर्ति र बढ्दो आयात घटाउन देशभित्रै मासुजन्य पदार्थको उत्पादन बढाउने उद्देश्यले बैंकले नेपाल सरकारको ऋण सहयोगमा २०६७ चैत्र महिना देखि क्रमशः पशुपालन कर्जा कार्यक्रम सञ्चालन गरेको छ । यस कार्यक्रमबाट २०७२ माघसम्ममा ३३० सहकारी संस्थाका ६० हजार जना किसानलाई ४९४ करोड कर्जा प्रवाह भएको छ ।
२०५८ फागुन २७ गते नेपाल राष्ट्र बैंकबाट राष्ट्रीयस्तरको “घ” वर्गको लघुवित्त बैंकको रुपमा स्वीकृत प्राप्त गरी यस साना किसान विकास बैंकको स्थापना भएको हो ।
वि.सं.२०७२ फागुन २८ शुक्रवार १७:२६ मा प्रकाशित
