काठमाडौं । भारतीय नाकाबन्दीका बेला काठमाडौं दाउरा युगमा फर्कियो, सरकार आफैंले राजधानीमा दाउरा बेचेर ग्यास नपाएका उपभोक्तालाई सहज पनि गराइदियो ।
हाल ग्यास आपूर्ति तुलनात्मक रुपमा सहज भएपछि सरकारसँग दाउरा किन्ने सर्वसाधारण अब छिटपुट मात्रै छन् । ३ ठाउँमा डिपो राखेर दाउरा बेचेको टिम्बर कपोरेशन अफ नेपाल (टीसीएन)ले अहिले एउटा डिपोबाट मात्र दाउरा बेचिरहेको छ ।
स्वयम्भु, पशुपति र भक्तपुरका दाउरा डिपोबाट अहिले सर्वसाधारणलाई दाउरा बेच्न बन्द गरिएको छ । ललितपुरको बालकुमारीस्थित डिपोबाट भने सर्बसाधारणले अझै दाउरा किन्न सक्ने टीसीएनका महाप्रबन्धक विरेन्द्र यादवले जानकारी दिए ।
३ करोड बढी कमाइ
सरकारले नाकाबन्दीको बेला दाउरा बेचेर ३ करोड रुपैयाँ भन्दा बढी कमाएको छ । कात्तिकमा दाउरा बेच्न थालिएयता मात्रै २० लाख किलो दाउरा बिक्री भएको छ । नाकाबन्दी कायमै रहँदा दैनिक साढे २८ हजार किलोसम्म दाउरा बिक्री भएको थियो । त्यसबेला टीसीएनले दैनिक औसत ४ लाख ३० हजार रुपैयाँ बराबरको दाउरा बिकेको थियो ।
सरकारले प्रतिपरिवार सय केजीसम्म दाउरा बिक्री गरिरहेको छ । दाउराको मूल्य किलोको १५ रुपैयाँ तोकिएको छ । संस्थागत रुपमा दाउरा लैजानेलाई भने किलोको १७ रुपैयाँ लिइएको छ ।
टीसीएनले अब ७ चट्टा दाउरामा मात्रै सर्वसाधारणको बिक्रीका लागि ल्याउने योजना बनाएको छ । त्यो दाउरा बिकिसकेपछि दाउरा बेच्न बन्द गरिने महाप्रवन्धक यादवले बताए ।
प्रकाशितः २०७२ चैत्र ५
वि.सं.२०७२ चैत ५ शुक्रवार १२:३० मा प्रकाशित
