काठमाण्डौं । हामीकहाँ हत्या, बलात्कार, अपहरण जस्ता अपराधका अभियुक्तहरु समेत वर्षौँसम्म पक्राउ पर्दैनन् । तर भारतमा भने पुलिसले ४० वर्ष लगाएरै भएपनि एकजना कागती चोरलाई पक्रिएको छ ।
भारतको कर्नाटकस्थित कलाबुर्गी जिल्लामा कागती चोरी भएको ४० वर्षपछि उक्त कागती चोर्ने चोरलाई पक्रिन पुलिस सफल भएको हो । उक्त व्यक्तिले सन् १९७६ को नोभेम्बर १६ का दिन कागती चोरेको थियो ।
अहिले ५७ वर्षको भएको उक्त मानिसको नाम दशरथ पराडी हो । दशरथले १७ वर्षको उमेरमा ३ सय रुपैयाँ बराबरका कागती चोरेको रहेछ । कलाबुर्गी नजिकै गोला गाउँका शंकर गौडा पाटिल नामका व्यक्तिको खेतमा बोरामा राखिएको कागती उसले चोरेको थियो । खेतमा काम गर्ने एक कामदारले उक्त चोरीका बारेमा उजुरी गरेका थिए ।
चोरीको उजुरी गर्ने पाण्डु चौहान भन्ने व्यक्तिको केही दिन अघि निधन भैसकेको छ । पुलिसमा दिएको किटानी जाहेरीमा चौहानले दशरथले नै कागती चोरेको बताएका थिए । चोरी लगत्तै दशरथ फरार भएको थियो र पुलिसले उसलाई जत्ति खोजेपनि भेट्टाउन सकेको थिएन ।
यो वर्षको सुरुवातमै पुलिसले कलाबुर्गी जिल्लामा पूराना मुद्दा मामिला फस्र्यौट गर्ने अभियान सुरु गर्यो । उक्त कागती चोरीको मुद्दाका अभियुक्त दशरथलाई पक्रेर बुझाउनेलाई नगद पुरस्कार दिने घोषणा पनि गर्यो । पुलिसको विशेष टिमले अभियुक्तको खोजी गर्दा दुइ महिनापछि कलाबुर्गी नजिकैको सुल्तानपुर गाउँमा दशरथ पराडी नामका व्यक्ति भएको पत्ता लगायो ।
त्यसपछि सादा पोषाकमा प्रहरी उक्त गाउँमा पुगेर दशरथसँग सोधपुछ गर्दा उसले सन् १९७६ मा आफु गोला गाउँमा बस्ने गरेको र आफुले नै कागती चोरेको कुरा स्विकार गर्यो । आफुले चोरेका कागती अफजलपुरमा लागेको एक मेलामा लगेर बेचेको पनि उसले खुलासा गर्यो ।
वि.सं.२०७२ चैत ६ शनिवार १३:५७ मा प्रकाशित
