काठमाण्डौं । एमाओवादी सांसद ल्हारक्याल लामा ३० लाख धरौटीमा छुटेका छन्। वैदेशिक रोजगार विभागले लामासँग् ठगीको मुद्दामा ३० लाख धरौटी मागेपछि बुझाएर लामा छुटेका हुन् । लामालाई आज दिनभर वैदेशिक रोजगार विभागले बयान लिएको थियो । विभागका तर्फबाट कानुन अधिकृत सचित वाइवाले बयान लिएका थिए।
अपरच्युनिटी म्यानपावर सर्भिसेजका अध्यक्ष केशबबहादुर गुरुङले लामासहित फुर्वा लामा र तिरिङडोल्ला लामाविरुद्ध २०६९ भदौमा उजुरी दिएका थिए। ल्यारक्यालले मकाउमा हाउसकिपिङ, क्लिनर, वेटर र सेक्युरिटी गार्डको तीन सय २० जनाको कोटा ल्याइदिने भन्दै पटक-पटक गरी दुई करोड १९ लाख रुपैयाँ ठगी गरेको भन्दै विभागमा उजुरी परेको थियो।
वैदेशिक रोजगारबाट छुटेपछि लामाले आफूलाई सुनुयोजित रुपमा फसाएको र यस बारेमा पत्रकार सम्मेलन गरेर जानकारी दिने बताए। लामाको लकरमा १४ थान गोली भेटिएपछि गत फागुन ३० गते उनी पक्राउ परेका थिए। ६६ हजार ७ सय धरौटीमा छुटेका लामा वैदेशिक रोजगारमा ठगी गरेको मुद्दामा फेरि पक्राउ परेका थिए।
१० चैत, २०७२, ४.३०
वि.सं.२०७२ चैत १० बुधवार १६:५२ मा प्रकाशित
