काठमाडौ । नेपाल ट्रेड यूनियन महासंघ (जिफन्ट)का महासचिव विष्णु लम्सालले श्रमिकका हित विपरित काम गर्ने नीति निर्माताहरु अप्ठेरोमा पर्ने चेतावनी दिएका छन् । नेपाल बिजुली, पेन्टर, प्लम्बर तथा निर्माण मजदुर यूनियन (क्युपेक) नेपाल अन्तर्गत काठमाडौ महानगर कमिटीको प्रथम अधिवेशन उद्घाटन गर्दै महासचिव लम्सालले देश निर्माणमा योगदान गर्ने श्रमिकका हित नदेख्ने नीति निर्मातालाई पाखा लगाउनुपर्ने बताए ।
पासाड़ल्यामु कलेज सामाखुशीको प्राड़गणमा सम्पन्न अधिबेसनकाक्रममा निर्माण क्षेत्रमा थुप्रै समस्याहरु भएता पनि यो क्षेत्र उच्च सम्भावना रहेको बताए । क्यूपेक नेपालले बिश्वब्यापी मान्यतालाई चिर्दै असंगठित क्षेत्रको यो यूनियन जिफन्ट परिवार भित्रको दरीलो खम्बाको रूपमा रहेको उनको भनाई थियो ।
कार्यक्रममा क्यूपेक नेपालका अध्यक्ष नरनाथ लुईटेल, केन्द्रीय सल्लाहकारहरु तेज वहादुर बस्नेत, योगेन्द्र शर्मा, जिफन्ट वागमती अञ्चल अध्यक्ष रामहरि नेपाल, काठमाडौ जिल्ला अध्यक्ष वावुराम पोखरेल, काठमाडौ जिल्ला अन्तर्गतका नगर कमिटी अध्यक्षहरुले अधिवेशन सफलताको शुभकामना दिएका थिए ।
कार्यक्रमका अवसरमा क्यूपेक जिल्ला कमिटीको तर्फबाट जिल्ला अध्यक्ष बाबुराम पोखरेलले जिफन्ट ऐक्यबद्धता कोषमा नगद २५ हजार हस्तान्तरण गरेका थिए । त्यस्तै भूकम्प पिडित क्यूपेक नेपालका सदस्य मन्जु धिमिरेलाई ८,५०० हस्तान्तरण गरिएको थियो ।
१४ चैत २०७२ / १२:१०
वि.सं.२०७२ चैत १४ आइतवार २०:५६ मा प्रकाशित
