काठमाण्डौं । गत वर्षको विनाशकारी भूकम्पबाट बाँचेका नेपाली बालबालिकालाई भारतीय तस्करहरुले सस्तोमा किनेर बेलायती धनाढ्य परिवारलाई बेच्ने र ती परिवारले बालबालिकाहरुलाई दासस बनाइरहेको समाचार बेलायती पत्रिका द सनले सार्वजनिक गरेको छ ।
दैनिक १७ लाख ४२ हजार बढि प्रति छापिने र लाखौं पाठक भएको अखवार b सनका अन्डरकभर रिपोर्टरले गोप्य रुपमा गरेको खोजअनुसार, मानव तस्करहरुले १० वर्ष भन्दा कम उमेरका कलिला बालबालिकालाई घर पालुवा वस्तुको भन्दा कम भाउमा जनही ५ हजार पाउण्डमा बेचेर उनीहरुलाई यहाँ दास बन्न वाध्य बनाइएको उल्लेख छ ।
तस्कर गिरोहले बेचिएका बालबालिकालाई भारतमै केही समय तालिमपछि घुस दिएर बनाइएको फर्जी कागजातमार्फत बेलायत पठाउने गरिरहेको समाचारमा उल्लेख छ ।
भारतीय मानव तस्कर मख्खन सिंहले बालबालिकालाई लाइनमा राखेर रोजी रोजी किन्न अफर गरिरहेका थिए । पत्रिकाले नेपाली सिमा नजिक अमृतसरस्थित गोल्डेन टेम्पलबाट ५० माइल टाढा रहेको जलान्धारबाट खोजी सुरु गरेको थियो ।
ती पत्रिकाका खोजकर्ता बेलायतमा बसोवास गर्ने धनाढ्य सिख परिवारको भएको, उसकी श्रीमति विरामी र आमा वृद्ध भएकाले उनीहरुले नोकर खोजीरहेको बहानामा प्रस्तुत भएका थिए । उनलाई मन्दिर नजिक एकान्त ठाउंमा बोलाइएको थियो जहाँ तस्कर सिंह मोटरबाइकमा आइपुगेका थिए ।
सुटुक्क श्रव्य दृश्य खिचिएको चाल नपाएका ती तस्करले गर्वका साथ धेरै बालबालिका बेलायत पठाएको बताएका थिए । पत्रिकाका संवाददाताले वालवालिका बेचविखन त अप्ठेरो काम होइन भन्दा सिंहले नेपाल भूकम्पले ध्वस्त भएकाले अधिकांश नेपाली यतै भएको र भारतमा पनि त्यस्ता केटाकेटी पर्याप्त भएको बताएका थिए ।
‘हामी गरिब परिवारकहाँ जान्छौं र कुराकानी गरेर डिल गर्छौं’, सिंहले भनेका थिए । उनले १२ वा १३ वर्षका बालबालिका लैजान पनि सुझाएको द सनले लेखेको छ ।
उनले नेपाल वा बिहार जहाँको लगे पनि हुने तर यो वापत ५ लाख भारतीय रुपैयाँ वा ५ हजार २५० पाउण्ड तिर्नुपर्ने भनेका थिए ।
सिंहले वृद्ध आमा र बिरामी श्रीमतीको रेखदेख गर्न र खाना पकाउन नेपाली लैजान सुझाव दिंदै अधिकांश इंग्ल्याण्ड लगिएका बालबालिका नेपाली भएको समेत बताएका थिए ।
बेलायती गृहमन्त्री टेरेजा मेले अखवारको उक्त सनसनीपूर्ण समाचारबारे छानबिन गर्न नेशनल क्राइम एजेन्सीलाई आग्रह गरेकी छिन् । ‘बालबालिका बेचवखन एउटा घृणित अपराध हो, कुनै पनि बालबालिकालाई दास बनाइनु हुन्न’, गृहमन्त्री मेले सन् पत्रिकासंग भनेकी छिन् ।
२२ चैत २०७२, ११।००
वि.सं.२०७२ चैत २२ सोमवार ११:४८ मा प्रकाशित
