काठमाण्डौं । भूकम्प पीडितका लागि जापान सरकार र आफ्ना निकायले पठाएको करिब ३२ अर्ब रकमप्रति जापानी सांसदहरुले चासो व्यक्त गरेका छन्। भूकम्प गएको झन्डै एक वर्ष पुग्न लागेको उल्लेख गर्दै उनीहरुले भूकम्प पीडितको अवस्थाबारे समेत चासो व्यक्त गरे।
जापान भ्रमणमा रहेको नेपाली सांसदहरुको टोलीसँग उनीहरुले भूकम्पपछिको पुनर्निर्माण र पीडितको राहत–उद्धारका विषयमा पनि जानकारी लिएका थिए। ‘जापान सरकार सहितका संस्थाहरुले पठाएको रकम कहाँ, कति, कसरी खर्च भइरहेको छ ?’ नेपाली टोलीसँगको भेटका क्रममा जापानका सांसदहरुले जिज्ञासा राखेका हुन्। जापानी लिबरल डेम्रोक्र्याटिक पार्टीका संसद तोसिहितो निकाई सहितको ५ सदस्यीय टोलीसँग नेपाली सांसदहरुले हाउस अफ रिप्रिजेन्टेटिभमा भेट गरेका थिए।
मुलुकी ऐन प्रतिस्थापनका लागि बृहत् अध्ययनको क्रममा रहेको संसदको विधायन समितिका सांसदहरु जापानमा छन्। जापानी सांसदहरुले नेपाललाई आवश्यक भए संघीयता सम्बन्धी कानुन निर्माण र भूकम्पको पुनर्निर्माणका सहयोग गर्ने आश्वासन समेत दिएका छन्।
३ बैशाख २०७३, १२।००
वि.सं.२०७३ वैशाख ३ शुक्रवार १३:५७ मा प्रकाशित
