काठमाण्डौं । वैशाख १२ को विनाशकारी भूकम्पमा भत्किएको घरको भग्नावशेषबाट २२ घण्टापछि नेपाली सेनाद्वारा जीवितै उद्दार गरिएका भक्तपुर सोनिश अवालेलाई नेपाली सेनाले निःशुल्क पढाउने भएको छ ।
भूकम्प गएको एक बर्ष पुगेकै दिन सेनाले सोनिशलाई स्नातकसम्म पढाउने घोषणा गरेको हो । सैनिक मुख्यालयमा आइतबार भएको कार्यक्रममा प्रधानसेनापति राजेन्द्र क्षत्रीले सोनिशलाई सैनिक विद्यालयमा निःशुल्क पढाउने प्रतिबद्धता व्यक्त गरेका हुन् ।
सोनिस अहिले १६ महिनाका भएका छन् । सोनिशलाई नेपाली सेनाले भक्तपुर सल्लाघारीस्थित सैनिक आवासीय महाविद्यालयमा ६ देखि स्नातक तहसम्म निःशुल्क पढ्ने व्यवस्था मिलाइनेछ ।
त्यसअघि ५ कक्षासम्मको शिक्षा अभिभावकले व्यवस्था गरेको विद्यालयमा नै अध्ययन गराइने तर, उनको शिक्षाका लागि आवश्यक पर्ने सम्पूर्ण सुविधा सेनाले नै उपलब्ध गराउनेछ ।
१२ बैशाख २०७३, ३।३०
वि.सं.२०७३ वैशाख १२ आइतवार १६:४७ मा प्रकाशित
