काठमाण्डौं । नेपाल धितोपत्र बोर्डले प्राथमिक सेयरको कारोबार सुरु हुन लाग्ने समय घटाउन गृहकार्य थालेको छ । बोर्डले सेयर निष्कासन देखि कारोबार गर्दासम्म जम्मा दुई महिनामात्रै लाग्ने गरि नयाँ व्यवस्था गर्न लागेको हो ।
‘हामी अहिलेको समय घटाउने गृहकार्यमा छौं, बोर्डका कार्यकारी निर्देशक निरज गिरीले भने, अहिले ६ महिना भन्दा बढी समय लाग्छ । यसलाई घटाएर दुई महिनामा झार्ने योजना छ ।’ सार्वजनिक निष्कासनको सेयर बाँडफाडकै समय धेरै समय लाग्छ । यसले गर्दा साधारण सेयर भर्ने व्यक्तिले ६ महिना जतिमा मात्रै दोस्रो बजारमा कारोबार गर्न पाउँछ ।
धितोपत्र बोर्डले नै गरेको अध्ययनमा साधारण सेयर भर्ने देखि दोस्रो बजारमा सेयर कारोबार हुँदासम्म औसतमा ६ महिनाको समय लाग्ने गरेको छ । यो अवधिसम्म लगानीकर्ताले सेयरलाई सम्पत्तिका रुपमा प्रयोग गर्न पाउँदैनन् ।
डिम्याट खाता खोलेर सेयर भर्न लागेपछि समय घट्ने अनुमान गरिएको छ । काठमाडौं उपत्यकामा साउन देखि डिम्याट खाता राखेर मात्रै सेयर भर्न पाइन्छ । साधारण सेयर वितरण पछि पनि कम्पनीले नेपाल स्टक एक्सचेन्जसँग ढिला सूचीकरण संझौता गरिदिँदा पनि कारोबारको समय धेरै लाग्ने गरेको हो |
१४ बैशाख २०७२, २।००
वि.सं.२०७३ वैशाख १४ मंगलवार १४:१८ मा प्रकाशित
