काठमाण्डौं । बाँदरले दुस्ख दिन थालेपछि केरौँजाका किसानले मकै नभित्र्याउने वेलासम्मका लागि तलब दिएर बाादर धपाउन मान्छे राखेका छन्। केरौँजा–५ र ६ का किसानले मासिक २५ हजारका दरले तलब दिने गरी चारजना हेरालो राखेका हुन्।नयाँ पत्रिका दैनिकमा समाचार छ।
मकै जोगाउन मान्छे राखिएको केरौँजा–६ रुन्चेतका गोपाल घलेले बताए। ‘भूकम्प गएकाले पोहोर खेती लगाएनौँ। राहतका भरमा एक वर्ष कट्यो। सधैँ त राहत पाइँदैन होला। यसपटक पनि मकै लगाइएन भने के खाने ? घलेले भने, ‘यसपालि बारीमा मकै लगाएका छौँ। बाँदरले सखाप बनाउने भएकाले बाली जोगाउन हेरालो राखेका हौँ।’
जेठदेखि भदौसम्म हेरालो
जेठबाट भदौसम्मका लागि हेरालो राखिएको घलेले बताए। बारी टाढा भएको र यो समयमा गाउँमा मान्छे पनि कम हुन भएकाले हेरालो राखिएको उनको भनाइ छ। ‘घरबाट दुई–तीन घन्टा हिँडेर बारीमा जानुपर्छ,’ उनले भने, ‘फेरि यो सिजनमा हामी यार्सा संकलन गर्न जान्छौँ। मकै कुरेर बस्ने मान्छे पनि हुँदैन।’
यस क्षेत्रका अधिकांश बासिन्दा यार्सा संकलनका लागि मनाङ, मुस्ताङ तथा गोर्खाकै हिमाली क्षेत्रमा जाने गर्छन्।
प्रकाशितः २०७३ वैशाख १९
वि.सं.२०७३ वैशाख १९ आइतवार १०:२८ मा प्रकाशित
