काठमाण्डौं । ट्यांकर व्यवसायीहरुले सार्वजनिक मुहान तथा स्रोतमा गई निशुल्क भरेर ल्याएको पानी सर्वसाधारणलाई बेच्दा फरक फरक र चर्को मूल्य लिने गरेपछि अब सरकाले पानीको मूल्य निर्धारण गर्ने भएकोछ ।
सरकारले वास्तविक ढुवानी खर्चलाई मध्यनजर गर्र्दै शुल्क निर्धारण गर्ने भएको छ। त्यस्तै आपूर्ति भइरहेको खानेपानी सेवाको दर्ता र नियमन पनि गरिने भएको छ। नेपाल सरकारका मुख्य सचिव डा। सोमलाल सुवेदीको संयोजकत्वमा बसेको केन्द्रीय अनुगमन तथा मुल्याङ्कन समितिले यस्तो निर्णय गरेको हो।
त्यस्तै कतिपय ट्याङ्करहरुले ल्याउने गरेको पानी दुषित तथा पिउन अयोग्य समेत रहने गरेकोमा गुणस्तर कायम गर्ने सम्वन्धमा पनि सम्वन्धित निकायलाई निर्देशन दिई आवश्यक प्रक्रिया सुरु गर्न भनिएको छ।
वर्षेनि उपत्यकामा पानीको चर्को अभाव हुने गरेको छ। चैतदेखि जेठसम्म पानीको हाहाकार हुने यो अवधिमा ट्याङ्करबाट दैनिक ५ लाख लिटर पानी वितरण हुँदै आएको छ। माग भने सरदर दैनिक ३७ लाख लिटर छ। व्यवसायीहरुले एक ट्याङ्कर पानीमा १५ सय रुपैयाँदेखि ३ हजार रुपैयाँसम्म शुल्क लिने गरेका छन्।
२१ बैशाख २०७३, ९।००
वि.सं.२०७३ वैशाख २१ मंगलवार ११:०४ मा प्रकाशित
