तनहुँ । माछा मारेर जीविकोपार्जन गर्दै आएका जिल्लाको ब्याँश नगरपालिका–७ स्थित पाटनका बोटे समुदाय मादी नदी बगरमा सामूहिक तरबुजा खेतीतर्फ गर्न थालेका छन् ।
माछा पाइन छाडेपछि उनीहरु तरबुजा खेतीतर्फ अग्रसर भएका हुन् । करिब २० रोपनी जग्गामा १७ जनाको समूह बनाई तरबुजा खेती गर्दै आएका मादीसेती बोटे कृषक समूहकी अध्यक्ष रमिला बोटेले बताउनुभयो । गत वर्षयता रु ६० हजारको तरबुजा बिक्री गरेको उहाँको भनाइ छ ।
जिल्ला कृषि विकास कार्यालयले बगर खेती अभियानअन्तर्गत त्यस क्षेत्रका बोटे समुदायको जीवनस्तर उकास्ने उद्देश्यले सामूहिक तरबुजा खेतीतर्फ अग्रसर गराएको हो । उक्त समुदायलाई तरबुजाको बीउ, प्राविधिक सहयोगलगायतका अन्य आवश्यक सहयोग कार्यालयले गर्दै आएको वरिष्ठ कृषि विकास अधिकृत चेतनाथ अधिकारीले बताउनुभयो ।
तराई क्षेत्रमा उत्पादन गरेर आयत गरिएको तरबुजाभन्दा त्यस क्षेत्रमा बोटे समुदायले उत्पादन गरेका तरबुजाको बोक्रा पातलोका साथै स्वादिलो रहेको पाइएको अधिकारीको भनाइ छ । उक्त समुदायले उत्पादन गरेका तरबुजा दमौली बजार क्षेत्रमै प्रतिकिलो रु ५० मा बिक्री गरिँदै आएको छ ।
तरबुजा खेती माघ महिनादेखि सुरु गरिने र वैशाख महिनाभित्रमा उत्पादन लिइसकिने हुन्छ । जेठदेखि भदौ महिनासम्म उक्त बगरमा नदी बग्छ ।
२९ बैशाख २०७३, १२।००
वि.सं.२०७३ वैशाख २९ बुधवार १४:४२ मा प्रकाशित
