काठमाण्डौं । कार्यालयमा निर्धारित पोसाक नलगाएर आउने कर्मचारीहरुलाई कारवाही गर्ने गरिएको त देखे सुनेकै कुरा हो । तर बेलायतमा भने एकजना युवतीलाई हिल जुत्ता लगाउन नमानेको आरोपमा जागिरबाटै बर्खास्त गरिएको छ ।
लण्डनको बित्त कम्पनी पिडब्लुसी कम्पनीमा रिसेप्सनिस्टमा जागिर खाने २७ वर्षकी निकोला थर्पलाई हिल जुत्ता लगाउन अस्विकार गरेको निहुँमा जागिरबाटै निकालिएको हो ।
उक्त कम्पनीले उनलाई २ देखि ४ इनचसम्मको हिल लगाउन भनेको थियो तर उनले हिल लगाउन मानिन् । कम्पनीको नियम नमान्ने कर्मचारीलाई कम्पनीले राखिराख्ने कुरा भएन । त्यसैले उनलाई जागिरबाट बर्खास्त गरी रित्तो हात घर पठाइदियो ।
अफिसमा ९ घण्टा लगातार काम गर्नुपर्ने हुँदा हिल लगाएर काम गर्न गाह्रो पर्ने भएकाले आफुले सामान्य जुत्ता लगाउन दिन अनुरोध गरेको तर आफ्नो माग सुनुवाइ नभई उल्टै जागिरबाट निकालिएको उनले बताएकी छिन् ।
सुरुमा त यसरी जागिरबाट निकालिएपछि उनलाई बोल्न डर लागेको थियो । तर पछि उनलाई आफुमाथिको यस्तो व्यवहार निकै गम्भीर कुरा रहेको भन्ने लाग्यो । त्यसपछि उनले महिलामाथि कार्यस्थलमा हुने भेदभाव अन्त्य तथा हिल लगाउन बाध्य पार्न नपाइने कानून बनाउन माग गर्दै बेलायती संसदमा निवेदन गरेकी छिन् । बेलायतको मौजूदा कानूनले कुनैपनि कार्यालयको पोसाक नियम नमान्ने कर्मचारीलाई जागिरबाट हटाउन सकिने व्यवस्था गरेको छ ।
हिल जुत्ता नलगाएको आरोपमा जागिरबाट बर्खास्त भएकी निकोलाले कानून परिवर्तनका लागि संसदमा दर्ता गरेको निवेदनको समर्थन बढिरहेको छ । तर उनलाई आउटसोर्सिंग मार्फत वित्त कम्पनीमा जागिर दिलाइदिने आउटसोर्सिंग र्फमले भने निकोलाले जागिर सुरु गर्नुअघि ड्रेस कोड पालना गर्ने करारनामामा हस्ताक्षर गरेको र पछि निहुँ खोजेर हिल जुत्ता लगाउन नमानेको भन्दै आफ्नो बचाउ गरेको छ ।
प्रकाशितः २०७३ जेठ २
वि.सं.२०७३ जेठ २ आइतवार १३:०३ मा प्रकाशित
