दाङ । उत्पादन गरेको तरकारीको व्यवस्थित बजारीकरण नहुँदा किसान मारमा परेका छन् । चैतको मध्यदेखि उत्पादन हुन थालेको बेमौसमी तरकारी जेठ पहिलो सातामा आइपुग्दा उत्पादन बढेर १० गुना पुगेपनि तरकारीले बजार नपाउँदा किसान मारमा परेका हुन् ।
बेमौसमी तरकारीको देउखुरी बाहिर बजारीकरण हुन सकेको छैन । खपत भएको तरकारीको मूल्य समेत पाँचगुना घटेको किसान बताउँछन् ।
तरकारीको बजार व्यवस्थापनका लागि सरोकारवालाले चासो नदिएको किसानको गुनासो छ । देउखुरी क्षेत्रमा चिस्यान केन्द्र समेत छैन । त्यस्तोमा विचौलियाले फाइदा उठाउने गरेका छन् ।
करेला सोझै उपभोक्तालाई प्रतिकिलो रु २० देखि रु ३० मा बिक्री गरेपनि ठेकेदारले प्रतिकिलो रु १० देखि रु १२ मात्र दिने गरेका छन् । वैशाख अन्तिम सातासम्म करेला प्रतिकिलो रु ६० मा बिक्री भएको थियो ।
यस्तै बोडी प्रतिकिलो रु ३० रुपैयाँ, काँक्रा रु १५ देखि रु २० तथा रामतोरिया प्रतिकिलो रु ३० मा बिक्री भइरहेको छ । देउखुरीमा दैनिक सयौं टन तरकारी उत्पादन हुन्छ ।
१२ चैत २०७३, १.००
वि.सं.२०७३ जेठ १२ बुधवार १५:१० मा प्रकाशित
