काठमाण्डौं । भुकम्प र नाकाबन्दीका कारण नेपालीहरुको प्रति ब्यक्ति आम्दानी करिव एक हजार रुपैयाँले घटेको छ । एक नेपालीको बार्षिक आम्दानी ८२ हजार ७८९ रुपैयाँ २८ पैसा छ । यो हिसावले एक नेपालीले दैनिक २२६ रुपैयाँ ८१ पैसा कमाउँछन् ।
गत बर्ष एक नेपालीको बार्षिक आम्दानी ७७५ अमेरिकी डलर रहेकोमा यसपाली ७६६ डलरमा सीमित भएको छ । आज एक डलरको मूल्य १०८.०८ रुपैयाँ छ ।
सरकारले संसदमा प्रस्तुत गरेको आर्थिक सर्वेक्षण अनुसार पाँच बर्ष अगाडि पनि यसैगरी नेपालीहरुको आय घटेको थियो । प्रति ब्यक्ति कुल गार्हस्त उत्पादन पनि १० डलरले घटेर ७५२ डलरमा खुम्चिएको छ ।
सरकारले यस बर्षको आर्थिक बृद्धि दर ०।७७ प्रतिशत मात्र कायम हुने जनाएको छ । गत बर्षको आर्थिक बृद्धि दर २.३२ प्रतिशत थियो । सेवा क्षेत्रको बृद्धि दर घट्नुका साथै उद्योग क्षेत्र ६।३ प्रतिशतले ऋणात्मक भएका कारण समग्र आर्थिक बृद्धि दरमा असर देखिएको हो ।
१३ जेठ २०७३, ४.३०
वि.सं.२०७३ जेठ १३ बिहीवार १७:१८ मा प्रकाशित
