काठमाडौं । हिलेको सिंहदरबारस्थित संसद् भवन (ग्यालरी बैठक) साँघुरो हुने भएपछि बानेश्वरस्थित अन्तर्रा्ष्ट्रिय सम्मेलन केन्द्र भवनमा व्यवस्थापिका–संसद् सञ्चालनमा छ ।
०६४ मा संविधानसभा निर्वाचन भएपछि केन्द्रमा संसद् बैठक गरिएको हो । संसद् सचिवालयले ०६५ देखि भाडामा भवन प्रयोग गर्दै आएको छ । भवनको भाडा वार्षिक नौ करोड ६१ लाख रुपैयाँ रहेको छ ।
०६५ यता संसद् सचिवालयले भवन भाडा मात्र ७६ करोड ८८ लाख रुपैयाँ तिरेको छ । ‘यो त देखिएको खर्च मात्र हो, अन्य नदेखिने खर्च पनि धेरै भएका छन्,’ संसद् सचिवालयका सहसचिव सोमबहादुर थापाले भने, ‘सुरक्षाकर्मी तथा कर्मचारीको बन्दोबस्ती दुईतिर हुँदा, यातायात, दौडधुपलगायतका कुराले नदेखिने खर्च बढाएको छ ।’
व्यवस्थापिका–संसद् भवन बनाउने विषय उठेको झन्डै १८ वर्ष भएको छ । तर, अहिले सिंहदरबारस्थित पुतली बगैँचामै संसद् भवन बनाउने गरी संसद् सचिवालयले प्रक्रिया अगाडि बढाएको छ । तर, सरकारले यस वर्ष जम्मा ५० लाख रुपैयाँ बजेट मात्र विनियोजन गरेको छ ।
तत्कालीन शेरबहादुर देउवा नेतृत्वको सरकारले ०५५ मै सिंहदरबारस्थित पुतली बगैँचाको जग्गामा संसद् भवन बनाउने निर्णय गरेको थियो । तर, स्थानका विषयमा विवाद भयो ।
कार्यपालिका, न्यायपालिका र व्यवस्थापिका एकै ठाउँमा रहँदा संकुचन हुने भन्दै संसद् भवन बाहिर बनाउनुपर्ने आवाज उठेपछि विभिन्न अध्ययन समिति बनेका थिए । ती समितिले पुतली बगैँचामै भवन बनाउन उपयुक्त हुने निष्कर्ष दिएका छन् । आजको नयाँ पत्रिका दैनिकमा समाचार छ ।
प्रकाशितः २०७३ जेठ २०
वि.सं.२०७३ जेठ २० बिहीवार १०:१२ मा प्रकाशित