काठमाडौं । फ्रान्सले काठमाडौं उपत्यकाभित्र सहरी केबलकार सञ्चालन परियोजनासम्बन्धी एक सम्भाव्यता अध्ययन प्रतिवेदन सोमबार नेपाल सरकारसमक्ष पेस गरेको छ ।
प्रतिवेदन नेपालका लागि फ्रान्सेली राजदूत यभ्स कार्मोनाले भौतिक योजना तथा निर्माण मन्त्रालयलाई बुझाएका हुन् । फ्रान्सेली दूतावासद्वारा जारी विज्ञप्तिअनुसार ग्रिन इनर्जीबाट सञ्चालन गर्न सकिने भएकाले सहरी केबलकार मोनोरेल वा मेट्रो रेलभन्दा भरपर्दो, द्रुत निर्माण गर्न सकिने उत्तम खालको रहेको सम्भाव्यता अध्ययनले देखाएको छ ।
काठमाडौं उपत्यकाका लगनखेल–जमल, टंकेश्वर–गोंगबु बसपार्क, कलंकी–रत्नपार्क र बौद्धनाथ–विष्णुमतीमा चार लाइनका केबलकार सञ्जाल निर्माण गर्न सकिने प्रतिवेदनमा उल्लेख छ ।
नेपालका केही व्यवसायी तथा फ्रेन्च लगानीकर्ताले पब्लिक प्राइभेट पार्टनरसिप मोडेलमा काठमाडौंमा केबलकार परियोजना निर्माण गर्न इच्छा देखाएको दूतावासले जनाएको छ ।
प्रकाशितः २०७३ जेठ २५
वि.सं.२०७३ जेठ २५ मंगलवार १२:०२ मा प्रकाशित