काठमाडौंँ । रत्नपार्कमा आउने अवलोकनकर्ताको सुविधालाई ध्यानमा राख्दै केही समयमा पार्क्भित्र प्रतीक्षालय र खाजाघर बनाउने तयारी गरिएको छ ।
गत चैतको पहिलो सातादेखि रत्नपार्कमा इन्टरनेट सुविधा उपलब्ध भएसँगै त्यहाँ जाने अवलोकनकर्तालाई व्यवस्थापन गर्नका लागि प्रतीक्षालय र खाजाघर राख्न लागिएको कामपा, रानीपोखरी एकाइका सहायक प्रमुख उमेश भण्डारीले जानकारी दिए ।
उनका अनुसार गत शनिबार मात्रै रत्नपार्कमा अवलोकन गर्न आउने तीन हजार ११० जना थिए । झन्डै एक वर्षअघिदेखि रत्नपार्कको थप व्यवस्थापन गरी अवलोकनकर्ताबाट शुल्क समेत लिन थालिएको छ । प्रवेश शुल्क विद्यार्थीका लागि १५ रुपैयाँ तथा अन्यका लागि २५ रुपैयाँ निर्धारण गरिएको एकाइले जनाएको छ ।
गत शनिबार हालसम्मकै बढी अवलोकनकर्ता रत्नपार्कको अवलोकन गर्न आएका थिए । अवलोकन गर्न आएकाबाट प्रवेश शुल्कस्वरुप ७२ हजार ८ सय रुपैयाँ असुल गरिएको । अवलोकनकर्ताको सङ्ख्या वृद्धि भएसँगै आम्दानी पनि बढेको छ । अघिल्लो शनिबार ३५ हजार रुपैयाँ मात्र उठेको थियो ।
रत्नपार्कका पानी पर्दा ओत लाग्ने ठाउँ पनि बनाउने तयारी गरिएको छ ।
प्रकाशितः २०७३ जेठ २९
वि.सं.२०७३ जेठ २९ शनिवार १३:४५ मा प्रकाशित
