काठमाडौं । त्रिपालमुनि बसेकालाई जस्ताको छानामुनि ल्याउन भूकम्प प्रभावित क्षेत्रमा स्वयं सेवक परिचालन गर्ने प्रधानमन्त्री केपी शर्मा ओलीसहित राष्ट्रिय पुनर्निर्माण प्राधिकरणको योजना असफल भएको छ ।
प्राधिकरणले जेठ ७ देखि २१ गतेसम्म १५ दिनका लागि स्वयंसेवक परिचालन गर्ने लक्ष्य राखेर बनाएको निर्देशिका पनि अलपत्र परेको छ ।
प्रधानमन्त्री ओलीले राजनीतिक दलका कार्यकर्तालाई स्वयंसेवक बनाएर परिचालन गर्ने प्रस्तावलाई दलहरुले महत्व नदिएपछि यो योजना असफल भएको हो ।
भूकम्पबाट क्षतिग्रस्त निजी घर पुनर्निर्माणका लागि सरकारले उपलब्ध गराउने दुई लाख रुपैयाँ अनुदान सम्बद्ध लाभग्राहीसँग हुने अनुदान सम्झौतामा सहयोग पुर्याउने उद्देश्यसहित स्वयंसेवक परिचालन गर्न खोजिएको थियो ।
तर, प्रमुख प्रतिपक्षी दल कांग्रेसले स्थानीय पार्टी समितिलाई स्वयंसेवक परिचालित हुन दिएको निर्देशन कांग्रेसकै कार्यकर्ताले अवज्ञा गरेका थिए । अन्नपूर्ण पोस्ट दैनिकमा खबर छ ।
प्रकाशितः २०७३ जेठ ३
वि.सं.२०७३ जेठ ३० आइतवार १०:४४ मा प्रकाशित
