काठमाण्डौं । प्रमुख प्रतिपक्षी दल नेपाली कांग्रेसले भूकम्प पीडितका लागि प्रतिपरिवार दुई लाख रुपैया राहत उपलब्ध गराउन सरकारले ढिलाइ गरेको भन्दै बिहीबारको संसद अबरुद्ध गरेको छ ।
भूकम्प गएको १४ महिना वितिसक्दा पनि सरकारले त्यो रकम पीडितहरुका लागि उपलब्ध नगराउदा पीडितहरु सुरक्षीत बासबाट बञ्चित भएको आरोप कांग्रेसले लगाएको छ। गत वर्षको वैशाखमा गएको विनाशकारी भूकम्प पश्चात तत्कालिन सरकारले प्रतिपरिवार २ लाख रुपैया अस्थायी आवासका लागि उपलब्ध गराउने घोषणा गरेको थियो।
त्यसैगरी कांग्रेसले अघिल्लो सरकारले पीडितहरुको स्थायी आवास निर्माणका लागि शहरी क्षेत्रमा २५ लाख र गाउँमा १५ लाख सहुलियत ऋण उपलब्ध गराउने निर्णय विपरित वर्तमान सरकारले त्यसलाई घटाएर ३ लाखको दरले सामुहिक जमानीमा दिने घोषणाको पनि विरोध गरेको छ।
त्यसपछि सभामुखले सदन संचालनमा सहयोग गर्न प्रतिपक्षी दल तयार नभएको भन्दै असार १० गतेसम्मका लागि सदन स्थगित गरिन्।
९ असार २०७३,
वि.सं.२०७३ असार ९ बिहीवार १२:४९ मा प्रकाशित