काठमाण्डौं । झण्डै डेढ हप्तादेखि विद्युत आपूर्ति बन्द हुँदा बझाङ जिल्ला अस्पतालमा बीस लाख मूल्य बराबरको भ्याक्सीन बिग्रिएकाले जिल्लाका दुई हजार बढी बालबालिकाहरु खोप पाउनबाट बन्चित हुने भएका छन् ।
अस्पतालमा रहेको जेनेरेटरले नधान्ने भएकाले २ महिनालाई पुग्ने बिसीजी, डिपिटी, पोलीयो र दादुराका भ्याक्सिनहरु पूर्णरुपमा बिग्रिसकेको अस्पतालले जनाएकोछ ।
सदरमुकाम लगायत आसपासका गाविसलाई विद्युत उपलब्ध गराइरहेको सुर्मादेवी विद्युत प्रालिको पुनर्निर्माणको काम सुरु भएपछि विद्युत सेवा बन्द गरिएको थियो । वैकल्पिक व्यवस्थाका रुपमा जिल्ला अस्पताल लगायतका सरकारी कार्यालयहरुलाई बिजुली उपलब्ध गराउनका लागि दुईवटा ठूलो क्षमताका जेनेरेटरहरु सञ्चालनमा ल्याइएको थियो । तर, पुनर्निर्माणको काम सकिएकाले विद्युत गृहबाटै लाइन दिने भनेर जिल्ला अस्पतालमा विद्युत आपूर्ति गर्दै आएको जेनेरेटर सुर्मादेवीले हटाएपछि यो समस्या आएको हो ।
१२ असार २०७३, ११।००
वि.सं.२०७३ असार १२ आइतवार ११:१२ मा प्रकाशित