काठमाण्डौं । हिजो मंगलबार प्रधानमन्त्री केपी शर्मा ओली नेतृत्वको सरकारलाई दिएको समर्थन फिर्ता लिएको नेकपा माओवादी केन्द्रले प्रधानमन्त्रीले राजीनामा नदिए सरकारले पेस गरेको बजेट फेल गराउने निर्णय गरेकोछ । यता कांग्रेसको आज बिहान बसेको केन्द्रीय समितिको बैठकले प्रचण्ड नेतृत्वको सरकारलाई समर्थन गर्ने निर्णय गरेकोछ ।
लाजिम्पाटस्थित माओवादी अध्यक्ष पुष्पकमल दाहाल प्रचण्डको निवासमा आज बुधवार विहान बसेको माओवादी केन्द्रीय कार्यालयको बैठकले प्रधानमन्त्री ओलीको सरकार अल्पमतमा परेको भन्दै प्रधानमन्त्रीले राजीनामा नदिए बजेट पास गर्न समर्थन नजनाउने निर्णय गरेको छ । यस्तै बैठकले ओलीले राजीनामा नदिए संसदमा आज बुधवारै अविश्वासको प्रस्ताव दर्ता गर्ने पनि निर्णय गरेको छ ।
यता, नेपाली कांग्रेसले नेकपा माओवादी केन्द्रका अध्यक्ष पुष्पकमल दाहालको नेतृत्वमा सरकार गठनको सहमति प्रस्तावलाई अनुमोदन गरेको छ।
आज बिहान संसद भवन नयाँ बानेश्वरमा बसेको कांग्रेस केन्दीय समितिको बैठकले दुई दलबीच भएको ७ बुँदे सहमति पत्रलाई अनुमोदन गर्दै संविधान कार्यन्वयन, शान्ति प्रक्रियालाई पूर्णता दिँदै संविधानप्रति असन्तुष्टि जनाउँदै आन्दोलनमा रहेका मधेसी मोर्चा लगायतका पक्षसँग वार्ता र सहमतिद्वारा समस्याको समाधान गर्दै मुलुकलाई अघि बढाउने निर्णय गरेको छ।
२९ असार २०७३, ११।००
वि.सं.२०७३ असार २९ बुधवार ११:३४ मा प्रकाशित