काठमाण्डौं । एनआईसी एशिया बैंकले गत आर्थिक वर्षमा एक अर्ब सात करोड रुपैयाँ खुद नाफा कमाउन सफल भएकोछ । बैंकले हिजो बुधबार बाणिज्य बैंकतर्फ सबैभन्दा अगाडि बित्तीय बिबरण प्रकाशित गरेर खुद नाफामा ५७ प्रतिशतले बढोत्तरी गरेको देखाएको छ ।
गत वर्ष बैंकले ६८ करोड रुपैयाँ खुद नाफा कमाएको थियो । यो वर्ष दुई वटा बाणिज्य बैंक एनआईसी र बैंक अफ एशिया गाभिएर बनेको एनआईसी एशियाले नाफामा उल्लेख्य बृद्धि गरेको हो ।
बैंकले प्रस्तुत गरेको प्रगति विवरण अनुसार गत वर्ष बैंकले निक्षेपमा १६ अर्ब रुपैयाँ बढाएर ६९ अर्ब रुपैयाँ पुर्याएको छ । त्यस्तै कर्जा पनि १६ अर्ब रुपैयाँ नै बृद्धि गरेको छ । निक्षेप र कर्जामा गरेको बृद्धिले आम्दानीमा सकारात्मक प्रभाव परेको हो ।
बैंकले खुद व्याज आम्दानी नै ४० करोड रुपैयाँ बढाएको छ । गत आर्थिक वर्षमा बैंकले व्याज आम्दानी एक अर्ब ९७ करोड रुपैयाँ पुर्यायो । त्यस्तै विदेशी विनिमय कारोबारबाट १६ करोड रुपैयाँ कमाएको छ ।
५ साउन २०७३, ९।००
वि.सं.२०७३ साउन ५ बुधवार ११:२१ मा प्रकाशित
