भक्तपुर । सूचना तथा सञ्चारमन्त्री शेरधन राईले चिनियाँ राष्ट्रपतिलाई नेपाल भ्रमण नगराउने नियतले वर्तमान सरकार बिघटन गरिएको दाबी गरेका छन् । रफत सञ्चार क्लबले आयोजना गरेको साक्षत्कार कार्यक्रममा बोल्दै उनले चिनियाँ राष्ट्रपतिको नेपाल भ्रमण पछि नेपालको कायापलट हुने डरले नेपाली काँग्रेस र माओवादी केन्द्रले त्यो सरकार बिघटन गरेको आरोप लगाए ।
कार्यक्रममा बोल्दै उनले वर्तमान सरकार माथि अविश्वासको प्रस्ताब काँग्रेस र माओवादीबीच गलत नियतले अध्याँरो कोठामा बसेर गरिएको र यसले सकारात्मक परिणाम नल्याउने भन्दै उहाँले यो नयाँ गठबन्धन नेपाल र नेपालीको हितमा नभएको दाबी गरे ।
संसदमा सभामुखले अभिभावकको भूमिका निर्वाह गर्नुपर्ने भएता पनि हाल उनको भूमिकालाई नियाल्ने हो भने निश्पक्ष नरहेको पनि उनले बताए । सभामुखले वर्तमान समयमा आफ्नो भूमिका निष्पक्ष राख्न नसक्दा राजनीतिक दलहरुबीच झडपको स्थिति उत्पन्न भएको र यसले संसदको मर्यादामा समेत प्रश्न उठेको उनको भनाई थियो ।
सोही क्रममा मन्त्री राईले वर्तमान सरकारले ल्याएको नीति र कार्यक्रम अब बन्ने सरकारले जस्ताको त्यस्तै कार्यान्वयन गर्नुपर्ने भन्दै यो नीति तथा कार्यक्रम २ करोड ८० लाख नेपाली जनताले अनुमोदन गरिसकेकाले यसलाई कार्यान्वयन गर्नु पर्नेमा जोड दिए ।
उनले नेपाली काँग्रेस र माओबादी केन्द्रबीच भएको सम्झौता आफ्नो इच्छाले भन्दा पनि बाहिरी प्रभावमा बनेको स्पष्ट भएको बिभिन्न स्थानमा गरिएका भोज र तराई आन्दोलन सरिक गठबन्धनले काँग्रेस र माओबादीलाई गरेको सहयोग रहेको बताए ।
वर्तमान सरकारले सञ्चार क्षेत्रमा देखिएका बिभिन्न अवरोधलाई नियन्त्रण गर्दै सञ्चार नीति सार्वजनिक गरेको र यसले सञ्चार क्षेत्रको बिकासमा अहंम भूमिका निर्वाह गर्ने भएकाले जस्ताको तस्तै कार्यान्वयन गरिनु पर्नेमा जोड दिए ।
६ साउन २०७३, १२।००
वि.सं.२०७३ साउन ६ बिहीवार १२:१३ मा प्रकाशित
