काठमाण्डौं । १६ दिनपछि प्राध्यापक डाक्टर गोविन्द केसीले आफैँले खुट्टाको उपचार गरेको सिन्धुपाल्चोकका ५ वर्षीय सरोज नेपाली र गोर्खा लो गाविसका ३७ वर्षीय भिक्षु छेवाङ नोर्बु लामाको हातबाट जुस पिउँदै अनशन अन्त्य गरेका छन्।
हिजो राति केसी र सरकारबीच चार बुँदे सहमति भएको थियो। त्यसैका आधारमा आज २ बजे अनशन अन्त्य गर्ने सहमति भएको हो । उनको अनशन अन्त्यको सहमतिपत्रमा सरकारका तर्फबाट वार्ता टोलीका संयोजक स्वास्थ्य मन्त्रालयका सचिव डा। सेनेन्द्रराज उप्रेतीले हस्ताक्षर गरेका थिए।
सो सहमतिमा विवादित मनमोहन मेमोरियल मेडिकल कलेजलाई अन्ततः वीर अस्पतालले खरिद गरी सरकारी स्वामित्वमा सञ्चालन गर्ने, सरकारी शिक्षण संस्थाहरूमा चिकित्साशास्त्र अध्ययनका लागि कम्तीमा ५० प्रतिशत सिट निःशुल्क, क्रमशः ७५ प्रतिशतसम्म पुर्याइने, सबै प्रदेशमा कम्तीमा एउटा सरकारी मेडिकल कलेज स्थापना गर्ने विषय प्रस्तावित विधेयकमा समावेश गरिने, काठमाडौं उपत्यकाभित्र १० वर्षसम्म मेडिकल, डेन्टल र नर्सिङ कलेजमा नयाँ सम्बन्धन नदिने, चिकित्सा शिक्षाको शुल्क र सिट संख्या चिकित्सा शिक्षा आयोगले निर्धारण गरेबमोजिम हुने, चिकित्सा शिक्षाका लागि आगामी शैक्षिक सत्रदेखि केन्द्रीय प्रवेश परीक्षा लिने लगायतका कुराहरु उल्लेख गरिएकोछ ।
१० साउन २०७३, ३.००
वि.सं.२०७३ साउन १० सोमवार १५:३५ मा प्रकाशित
