काठमाडौं । ३१ औं गृष्मकालीन ओलम्पिकमा भाग लिन नेपाली टोली आज ब्राजिलको रियो प्रस्थान गर्दैछ। नेपालबाट यस संस्करणको ओलम्पिकमा ५ खेलका ७ खेलाडीले सहभागिता जनाउँदैछन्।
नेपाली खेलाडीहरु दुई चरणमा रियो प्रस्थान गर्नेछन्। जसअन्तर्गत आज जुडो, पौडी र आर्चरी टोली रियो जानेछ। जुडोकी फुपुल्हामु खत्रीले ९ अगस्टमा प्रतिस्पर्धा गर्नेछिन्। उनले महिला ६३ केजी तौलसमूहमा प्रतिस्पर्धा गर्ने छिन्। त्यसैगरि आर्चरीका जितबहादुर मोक्तानले व्यक्तिगत रिकर्भतर्फ ७० मिटरमा प्रतिस्पर्धा गर्नेछन्। पौडीतर्फ ७ अगष्टमा महिलाको एक सय मिटर ब्याकस्ट्रोकमा गौरिका सिंहले प्रतिस्पर्धा गर्ने छिन्।
लण्डनमा रहेकी गौरिका उतैबाट ब्राजिलको रियो जाने कार्यक्रम रहेको छ। पुरुष पौडी खेलाडी शिरिष गुरुङले १ सय मिटर फ्रिस्टाइलमा प्रतिस्पधा गर्ने छन्। उनको प्रतिस्पर्धा ९ अगष्टमा हुने छ। एथ्लेटिक्स र तेक्वान्दोका टोली भने अगस्ट ७ मा त्यसतर्फ प्रस्थान गर्नेछ। तेक्वान्दोकी निशा रावलले २० अगस्टमा ६७ केजी भन्दा बढी तौल समूहमा प्रतिस्पर्धा गर्नेछिन्।
एथलेटिक्ककी सरस्वती भट्टराईले १५ सय मिटरमा १२ अगष्टमा प्रतिस्पर्धा गर्नेछिन्। पुरुष एथलेटिक्स खेलाडी हरिकुमार रिमालले ५ हजार मिटर दौडतर्फ भाग लिनेछन्। उनको प्रतिस्पर्धा १७ अगष्टमा हुनेछ। नेपाली टिमका सेफ दी मिसनका रुपमा रहेका राष्ट्रिय खेलकुद परिषद्का सदस्यसचिव केशवकुमार बिष्ट र सुजनलाल श्रेष्ठ भने शनिबार राति नै रियोतर्फ प्रस्थान गरेका छन्।
१६ साउन २०७३, ११।३०
वि.सं.२०७३ साउन १६ आइतवार १७:१६ मा प्रकाशित