पाल्पा जिल्लाबाट ३० लाख रुपैयाँको अम्रिसोका बिरुवा जिल्ला बाहिर निर्यात भएको छ।
पाल्पाको अम्रिसो बिरुवाबाट तनहुँ जिल्लामा व्यावसायिक अम्रिसो खेती हुँदै आएको छ। अम्रिसोको फूलको कुचोको रुपमा बढी प्रयोग हुँदै आएको छ भने पातको घाँसको रुपमा पशुको आहाराको प्रयोग हुँदै आएको पाइन्छ।
फेक गाविस–७, सोमहरका रामबहादुर बगालेले अम्रिसो बिरुवा बेचेर ५० हजार रुपैयाँ आम्दानी गरे। उनले अम्रिसोको बिरुवालाई गाउँमा नै बेच्न पाउँदा खुसी लागेको बताए। पहिला अम्रिसाको कुचो मात्र बिक्री हुने गरेकोमा अहिले बिरुवा समेत बिक्री हुँदै आएको छ।
पालुङमैनादी–५, खातुङका रामबहादुर कुँवरले करिब एक लाख रुपैयाँको बिरुवा बिक्री गरेको बताए। अम्रिसाको बिरुवा गाउँबाट बिक्री हुन्छ भन्ने थाहा नभएका यहाँका स्थानीयले बिरुवा बेच्न पाउँदा खुसी बनेका छन्।
अम्रिसोको बिरुवा सङ्कलन केन्द्रका प्रमुख कमल थापाका अनुसार जिल्लाबाट अर्को वर्ष ५० लाखको अम्रिसोको बिरुवा निकासी हुनेछ। अघिल्लो वर्ष बेचेको करिब २५ लाखको अम्रिसोबाट राम्रो लाभ पाएकाबाट माग आइरहेको छ। यस वर्ष ३० लाख जतिको अम्रिसोका बिरुवा निकासी हुने तयारीमा रहेको थापाले बताए।
पाल्पाका छहरा, पालुङमैनादी, फेक, भुवनपोखरीलगायतका स्थानबाट सङ्कलन गरिएका बिरुवा पठाउँदै आएकोे थापाले जानकारी गराए। जिल्लाको अधिकांश बिरुवा तनहुँमा लगिएको केन्द्रका थापाले बताए।
प्रकाशितः २०७३ साउन १७
वि.सं.२०७३ साउन १७ सोमवार ११:४४ मा प्रकाशित