काठमाण्डौं । मध्य साउन अर्थात १७ गतेसम्म देशभर ९२ प्रतिशत रोपाइँ सकिएको कृषि विकास मन्त्रालयले जनाएको छ। मन्त्रालयका अनुसार, कुल १४ लाख २५ हजार ३ सय ४६ हेक्टर रोपाइँयोग्य भूमीमध्ये अहिलेसम्म १३ लाख हेक्टर भन्दा बढी भूमिमा रोपाइँ भइसकेको छ।
सबैभन्दा बढी सुदुरपश्चिमाञ्चलमा ९९ दशमलव ५ प्रतिशत रोपाइँ भइसकेको छ। मन्त्रालयकै तथ्याङ्क अनुसार यो विकास क्षेत्रमा १ लाख ७० हजार १ सय १५ हेक्टर क्षेत्रफल रोपाइँयोग्य जमिन रहेको छ। त्यस्तै पूर्वाअञ्चलमा ३ लाख ८२ हजार ८ सय १७ हेक्टर रोपाइँयोग्य भूमीको ८१ प्रतिशतमा रोपाइँ भइसकेको छ। यस विकास क्षेत्रको उच्च पहाडी भेगमा ८२, मध्य पहाडी भेगमा ८५ र तराई क्षेत्रमा ८० प्रतिशत रोपाइँ भइसकेको छ ।
त्यस्तै मध्यमाञ्चलमा ३ लाख ९१ हजार ६ सय २३ हेक्टर रोपाइँयोग्य क्षेत्रफलमध्ये ८६ प्रतिशत भूमीमा रोपाइँ भइसकेको मन्त्रालयले जनाएको छ। पश्चिमाञ्चलमा ३ लाख ९ हजार ९० हेक्टर धानखेतीयोग्य जमिनमध्ये ९८ प्रतिशतमा रोपाइँ भइसकेको छ । मध्यपश्चिमाञ्चलमा भने ९७ प्रतिशत धान खेती योग्य जमिनमा रोपाइँ सम्पन्न भएको छ। यस क्षेत्रमा १ लाख ७२ हजार ६ सय ४१ हेक्टर जमिन धान खेतीयोग्य रहेको छ।
यस वर्ष मल अभाव र प्राकृतिक विपत्ति नभएमा गत वर्षभन्दा ७ लाख मेट्रिक टन धान उत्पादन बढ्ने मन्त्रालयले जनाएकोछ । गत वर्ष देशभरबाट ४३ लाख मेट्रिक टन धान उत्पादन भएको थियो भने यो वर्ष मन्त्रालयले ५० लाख मेट्रिक टन धान उत्पादन हुने अनुमान गरेको छ।
२० साउन २०७३, १२।००
वि.सं.२०७३ साउन २० बिहीवार १३:०७ मा प्रकाशित