काठमाडौ । राष्ट्रिय ध्वजाबाहक नेपाल वायु सेवा निगम (एनएसी)को काठमाडौ–दुबई सीधा उडान सुरु भएको छ । विमान अभावका कारण बन्द भएको झन्डै चार वर्षपछि निगमले पुनः बिहीबार देखि नियमित उडान सुरु गरेको हो । बिहीबार राति ११ः२० बजे १५८ यात्रु लिएर दुबई उडेको निगमको एयरबस शुक्रबार बिहान १०ः२५ बजे काठमाडौ फर्किएको निगमले जनाएको छ ।
निगमका अनुसार १५८ सिट क्षमताको ए– ३२० एयरबस काठमाडौ बाट क्याप्टेन रवीन्द्रपुरुष ढकालको नेतृत्वको चालक दलले उडान गरेको थियो भने दुबईबाट फर्कंदा क्याप्टेन विजय लामा नेतृत्वको आठ सदस्यीय टोलीले उडाएको थियो ।
उक्त जहाज निगमको नियमित तालिकाअनुसार सातामा तीनवटा उडान भर्नेछ । काठमाडौ बाट आइतबार, मङ्गलबार र बिहीबार तथा दुबईबाट सोमबार, बुधबार र शुक्रबार उडान भर्नेछ ।
काठमाडौ बाट दुबई उडान अवधि चार घन्टा ४० मिनेट र दुबईबाट काठमाडौ आउन चार घन्टा १५ मिनेट लाग्ने बताइएको छ । निगमले काठमाडौ–दुबई उडानको सुरुको प्रवद्र्धनात्मक भाडा दर दुईतर्फी ३२ हजार रुपैंया तोकिएको निगमले जनाएको छ ।
निगमले हाल दुई एयरबस र एउटा बोइङ जहाजमार्फत अन्तर्राष्ट्रिय उडान गरिरहेको छ । हाल निगमले भारतको नयाँ दिल्ली, मुम्बई, बैङ्लोर, मलेसियाको क्वालालम्पुर, थाइल्यान्डको बैंकक, कतारको दोहा र हङ्कङमा उडान भर्दै आएको छ । दुबई उडान सुरु गरेपछि निगमको आठवटा उडान गन्तव्य पुग्नेछ ।
यसअघि वि.सं २०४१ माघदेखि दुबईमा सुरु भएको निगमको व्यावसायिक उडान सन् २०१२ अगस्टदेखि बन्द भएको थियो ।
प्रकाशित मिति :२०७३ भदौ ३
वि.सं.२०७३ भदौ ३ शुक्रवार १८:३९ मा प्रकाशित
