चितवन । चितवनमा फैलिएको स्क्रब टाइफर्स रोगको १०४ जनामा सङ्क्रमण भएको पाइएको छ । जिल्ला जनस्वास्थ्य कार्यालय चितवनले शुक्रबार पत्रकार सम्मेलन गरि २२२ जनामा गरिएको परीक्षणमा १०४ जनामा सङ्क्रमण भएको पाईएको हो । चितवन मेडिकल कलेजका सञ्चालक डा दयाराम लम्सालका अनुसार यो रोगको बालबालिकामा बढी सङ्क्रमण देखिएको छ ।
चितवनमा सोही मेडिकल कलेजमा मात्रै रोगको परीक्षण हुँदै आएको छ । जनस्वास्थ्य कार्यालय चितवनले यसअघि ६७ जनामा सङ्क्रमण भएको सार्वजनिक गरेको थियो । केही दिनअघि किट सकिएकाले उपचारमा समस्या भए पनि अहिले भने किट आइपुगेको डा लम्सालले जानकारी दिएका छन् ।
अहिलेसम्म नेपालका २० जिल्लामा स्क्रब टाइफर्सका बिरामी भेटिएका छन् ।
मुख्यगरी मुसामा लाग्ने एक प्रकारको सङ्क्रमित किर्नाले टोकेमा यो रोग लाग्छ । टाउको दुख्ने, उच्च ज्वरो आउने, गर्दन र घाँटी वरिपरी मसिना बिबिरा आउने, पसिना आउने, ग्रन्थी सुनिने यसको लक्षण हो ।
प्रकाशित मिति: २०७३ भदौ ३
वि.सं.२०७३ भदौ ३ शुक्रवार १८:५८ मा प्रकाशित