काठमाण्डौं । राष्ट्रियस्तरको लघुवित्त कम्पनी आरएसडिसी वित्तीय संस्था लिमिटेडले हप्ता दिनका लागि निष्काशन गरेको साधारण शेयरमा दोस्रो दिनसम्ममा २ अर्ब रुपैंयाभन्दा बढीको आवेदन परेको छ ।
पहिलो दिन आइतबार २० गुणाभन्दा बढीको आवेदन परेको शेयरमा दोस्रो दिन सोमबार मात्र १ अर्ब १८ करोड रुपैंयाभन्दा बढीको आवेदन परेको हो । भदौ ५ गते आइतबारबाट सर्वसाधारणका लागि शेयर निष्कासन गरेको कम्पनीको शेयरका लागि पहिलो दिन १७ हजार वटा आवेदन गरेकोमा सोमबार थप २६ हजार आवेदन परेको हो । यस कम्पनीले एक सय रुपैयाँ अंकित दरका ४ करोड रुपैयाँ बराबरको ४ लाख कित्ता शेयर सर्वसाधारणका लागि निष्काशन गरेको थियो ।
निष्काशित ४ लाख कित्ता साधारण शेयरमध्ये ८ हजार कित्ता कर्मचारीका लागि र ५ प्रतिशत अर्थात २० हजार कित्ता शेयर यसअघि नै सामूहिक लगानी कोषका लागि बाँडफाँड भैसकेको छ । बाँकी रहेको तीन लाख ७२ हजार कित्ता शेयर मात्र सर्वसाधारणले पाउने छन् । कम्पनीको शेयर निष्कासन तथा विक्री प्रबन्धक एनआइबिएल क्यापिटल रहेकोछ । कम्पनीको शेयरमा कम्तिमा ५० कित्ता अर्थात ५ हजार रुपैयाँ र बढीमा ४ हजार कित्ता अर्थात चार लाख रुपैयाँँ सम्मको लागि आवेदन दिन सकिने कम्पनीले जनाएको छ ।
भदौ ५ आइतबारदेखि खुलेको शेयरमा छिटोमा भदौ ८ र ढिलोमा १९ गतेसम्म आवेदन दिन सकिने कम्पनीले जनाएको छ ।
७ भदौ २०७३, ११।००
वि.सं.२०७३ भदौ ७ मंगलवार १३:५० मा प्रकाशित
