काठमाडौं । नेपाल राष्ट्र बैंकले शेयर धितोमा प्रवाह हुने कर्जामा कडाइ गरेको छ । बैंक तथा वित्तीय संस्थाहरुले अब संस्थापक शेयर धितो कर्जामा ५० प्रतिशतमात्रै ऋण पाउने भएका छन् ।
बैंकले चालू आर्थिक वर्षको मौद्रिक नीतिमा उल्लेख भएबमोजिम एकीकृत निर्देशन २०७२ का व्यवस्थालाई संशोधन गर्दै शेयर र घरजग्गा तथा रियल स्टेट धितोमा दिइने मार्जिन लेन्डिङमा कडाई गरेको हो ।
नयाँ व्यवस्थाअनुसार बैंक तथा वित्तीय संस्थाले शेयर धितोमा पछिल्लो १८० दिनको औसत मूल्य या प्रचलित बजार मूल्यमध्ये जुन कम हुन्छ त्यसको ५० प्रतिशत मात्र कर्जा लगानी गर्न पाउनेछन् । यसअघि १८० दिनको औसत या प्रचलित बजार मूल्यमा जुन कम हुन्छ त्यसको आधारमा बैंकहरु आफैंले जोखिमको मूल्यांकन गरी लगानी गर्नसक्ने व्यवस्था थियो ।
त्यस्तै राष्ट्र बैंकले घर जग्गा तथा रियल स्टेट धितोमा प्रवाह गर्ने कर्जाको सीमासमेत घटाएको छ । रियल स्टेट धितोमा कर्जा लगानी गर्दा बजार मूल्यको ५० प्रतिशत र आवासीय घर कर्जा ६० प्रतिशत मात्र लगानी गर्न पाउने व्यवस्था गरिएको छ ।
कर्जा प्रवाहमा कडा रुपमा प्रस्तुत भएको राष्ट्र बैंकले रकम भुक्तानीमा पनि कडाई गरेको छ । नयाँ व्यवस्था अनुसार बैंक तथा वित्तीय संस्थाले अनिवार्य एकाउन्टपेयी चेक काट्नु पर्ने रकमको सीमा पनि घटाएको छ । नयाँ व्यवस्थाअनुसार ३० लाखभन्दा बढीको भुक्तानी अनिवार्य रूपमा एकाउन्टपेयी चेकमार्फत गर्नुपर्नेछ । यसअघि यसको सीमा ५० लाख रुपैयाँ थियो ।
प्रकाशितः २०७३ भदौ ९
वि.सं.२०७३ भदौ ९ बिहीवार १४:२३ मा प्रकाशित
