काठमाडौ । आपूर्ति व्यवस्थापन तथा उपभोक्ता हित संरक्षण विभागको सक्रियतामा दैनिकरुपमा आक्रामक अनुगमन भईरहेको छ । सोहिक्रममा सोमबारको अनुगमनकाक्रममा विभिन्न पसलमा सिलबन्दी गरियो । सामान जफत गरिएको छ ।
व्यवसाय नवीकरण नगरेको कारण प्रकाश पोलिक्लिनिक प्रालि टेकु र टेकु ल्याब प्याथोलोजीलाई सिलबन्दी गरीयो । थप कारबाहीका लागि विभागमा बोलाइएको छ । त्यसैगरी प्रकाश फार्मेसिया टेकु, तिवारी मेडिकल हल कुलेश्वर र निलम औषधि घर त्रिपुरेश्वरलाई पनि बिलको ढाँचा बनाउन, शृङ्गारिक सामान र औषधि फरक फरक स्थानमा राख्न निर्देशन दिइएको विभागका निर्देशक लक्ष्मण श्रेष्ठले बताए ।
निरीक्षण अधिकृत ढुण्डीराज पोखरेलका अगुवाइमा काठमाडौको कोटेश्वर क्षेत्रका १२ खाद्यान्न पसलमा गरिएको अनुगमनका क्रममा अधिकांश पसलमा मूल्यसूची नभएको, लेबल नभएको, नापतौल यन्त्र प्रमाणीकरण नगरिएको र केहीको व्यवसाय दर्ता समेत नगरेको पाइएको छ । यी सबै पसलका सञ्चालकलाई तीन दिनभित्र सबै कैफियत सुधार गरी विभागमा आउन निर्देशन दिइएको छ ।
संस्था दर्तासम्बन्धी कागजपत्र प्राप्त नभएपछि नेपाल चौपाया खरिद बिक्री सहकारी संस्था सतुङ्गल र किमाल फ्रेस हाउस सतुङ्गललाई सात दिनभित्र दर्तासम्बन्धी कागजपत्र लिएर विभागमा आउन निर्देशन दिइएको छ । मासुको मूल्यसूची नराखिएको, सूचनापाटी नराखिएको र नापतौल यन्त्र प्रमाणीकरण नगरेको पाइएकाले आशीर्वाद मासु पसल सतुङ्गल र प्राइम फुड एन्ड डेलिकेटेस नैकापलाई पनि सात दिनभित्र सबै काम सकी विभागमा आउन निर्देशन दिइएको छ ।
अनुगमनकै क्रममा बढी भाडा लिइएको र भाडा दर नराखिएको आरोपमा २८ सार्वजनिक सवारी साधनलाई कारबाहीका लागि ट्राफिक प्रहरीको जिम्मा लगाईउको छ ।
प्रकाशित मितिः २०७३ भदौ १३
वि.सं.२०७३ भदौ १३ सोमवार २०:४६ मा प्रकाशित
