काठमाण्डौं । मुक्तिनाथ विकास बैंक, मितेरी डेभलपमेण्ट बैंक र अरनिको डेभलपमेण्ट बैंकलाई नेपाल धितोपत्र बोर्डले हकप्रद निष्काशनका लागि स्वीकृति दिएको छ । मुक्तिनाथ र मितेरीले ५० प्रतिशत तथा अरनिको डेभलपमेण्ट बैंकले १० बराबर ३ दशमलव ६ कित्ताका दरले हकप्रद निष्काशनको अनुमती पाएका हुन् ।
पचाश प्रतिशत हकप्रद जारी गर्न लागेको मुक्तिनाथ बैंकको ८४ करोड रुपैयाँ चुक्तापूँजी रहेको छ । ५० प्रतिशत हकप्रद निष्काशन पश्चात बैंकको चुक्ता पूँजी १ अर्ब ३० करोड रुपैंयाको हाराहारीमा पुग्नेछ ।
पोखरामा मुख्य कार्यालय रहेको मुक्तिनाथले लघुवित्तको समेत काम गर्दै आएको छ । राष्टिय्रस्तरको बिकास बैंकमा रुपान्तरण भएको यसका शाखा काठमाडौमा पनि छ । गत आर्थिक बर्षमा ३५ करोड ८८ लाख रुपैयाँ खुद नाफा कमाएका बेंकले अघिल्लो आर्थिक बर्षमा २१ करोड ७६ लाख मात्र खुद नाफा कमाएकोमा गत बर्ष १४ करोडले बढाएको हो । बैंकको सेयर निष्काशन तथा बिक्रि प्रबन्धक एनआईबिएल क्यापिटल रहेको छ ।
त्यस्तै, धरानमा मुख्य कार्यालय रहेको मितेरी डेभलपेमन्ट बैंकले पनि पचास प्रतिशत अर्थात् २ः१ को अनुपातमा हकप्रद निष्काशनका लागि अनुमती पाएको छ । मितेरीले १० करोड ५६ लाख रुपैयाँ बराबरको १० लाख ५६ हजार ३ सय ६९ कित्ता हकप्रद निष्काशनको अनुमति पाएको हो । मितेरीको सेयर निष्काशन तथा बिक्री प्रबन्धक प्रभु क्यापिटल रहेको छ ।
यसका साथै, अरनिको डेभलपमेण्ट बैंकले पनि १० बराबर ३ दशमलव ६ कित हकप्रद निष्काशनको अनुमती पाएको हो । बैंकको अहिले चुक्ता पूँजी २५ करोड ७८ लाख रुपैंया रहेको छ । हकप्रद निष्काशन पश्चात बैंकको चुक्ता पूँजी ३५ करोड १० लाख रुपैंयाको हाराहारीमा पुग्नेछ ।
१७ भदौ २०७३, ९।००
वि.सं.२०७३ भदौ १७ शुक्रवार १०:५० मा प्रकाशित
