साहसिक पर्यटकलाई आकर्षित गर्न निजी क्षेत्रको लगानीमा पर्वतमा मुलुककै नमुना बन्जी जम्प निर्माण सुरु गरिएको छ ।
उक्त पुल विश्वकै दोस्रो अग्लो पुल हुने दाबी गरिएको छ । पर्वत सदरमुकाम कुश्माबजार देखि छिमेकी जिल्ला बागलुङको नारायणस्थान गाविसस्थित नेपाने जोड्ने गरी कालीगण्डकीमाथि पुल निर्माण गरेर बन्जी जम्प सञ्चालन गर्ने तयारी गरिएको हो । बन्जी जम्प सञ्चालनका लागि इन्टु द वाइल्ड मल्टी प्रपोज प्रालिले आफ्नै लगानीमा पुल निर्माणको कामलाई अगाडि बढाएको छ ।
कुश्मा–बलेवा जोड्ने गरी कालीगण्डकी नदीमा १२ करोड रुपैयाँको लागतमा ५३५ मिटर लम्बाइ र २२५ मिटर उचाइको पुल निर्माण गरी बन्जी जम्प निर्माण गर्न सुरु गरिएको हो । अहिलेसम्म कुश्मातर्फ फाउन्डेसनको काम सकेर बलेवा क्षेत्रमा काम गर्न थालिएको प्रालिका राजु कार्कीले जानकारी दिएका छन् ।
उक्त बन्जी जम्प गरिने पुल विश्वकै दोस्रो अग्लो पुल हुने कार्कीले बताए । कम्पनीले बन्जी खेल्न आउने पर्यटकका लागि भनेर रिसोर्ट समेत निर्माण सुरु गरेको छ ।
कुश्मा बलेवा क्षेत्रको पर्यटन विकासका लागि यसअगाडि सोही ठाउँमा यान्त्रिक पुल, कुश्मा–बलेवा जोड्ने झोलुङ्गेपुल, बलेवा विमानस्थल सञ्चालनका लागि पहल तथा बलेवाको भैरवस्थान मन्दिरको व्यवस्थापनका काम पनि भइरहेका छन् ।
प्रकाशित मितिः २०७३ भदौ १९
वि.सं.२०७३ भदौ १९ आइतवार १६:५० मा प्रकाशित
