नेपालको पुँजी बजारमा सामूहिक लगानी कोषअन्तर्गत योजना संचालन गर्ने क्रममा नबिल बैंकले दोश्रो म्युचुअल फण्डका रुपमा ‘नबिल इक्विटी फण्ड’ बजारमा ल्याएको छ।
भदौ २ गतेदेखि बिक्री खुला हुने नबिल इक्विटी फण्ड मागभन्दा बढीको आवेदन परेमा असोज ६ गते बन्द हुने योजना व्यवस्थापक नबिल इन्भेष्टमेण्ट बैंकिङले जनाएको छ।
इच्छुक लगानीकर्ताहरुले यस योजनामा न्यूनतम १ हजार अर्थात १ सय इकाईदेखि अधिकतम १० करोड अर्थात १ करोड इकाईसम्म लगानी गर्न सक्ने छन्। म्युचुअल फण्डको प्रतिइकाई मूल्य १० रुपैयाँ रहने गर्दछ।
नबिल बैंकका तोकिएका शाखा कार्यालयहरु वा नबिल इन्भेष्टमेन्ट नक्सालमा सम्पर्क राखी फारम लिन र आवेदन बुझाउन सक्ने योजना व्यवस्थापकले बताएको छ।
साथै नबिल बैंक तथा नबिल इन्भेष्टले बीज पुँजीको रुपमा योजनाको १५ प्रतिशत रकम लगानी गर्ने निर्णय गरिसकेका छन्।
यो एक बन्दमुखी योजना हो जसको आकार एक अर्बको रहने कम्पनीले जनाएको छ। अवधि ७ बर्षको रहने छ। इकाई बिक्रीबाट उठेको वा संकलन भएको रकमलाई विविध क्षेत्र र उपकरणहरुमा जोखिम न्यूनीकरण गर्दै लगानी गरी सोबाट आर्जन भएकोे मुनाफा इकाईधनीहरुलाई वितरण हुनेछ।
यस योजनाको इकाईहरु नेपाल स्टक एक्सचेन्जमा सूचिकृत गरी कारोबारको व्यवस्था मिलाईने कम्पनीले जनाएको छ।
यसअघि पहिलो म्युचुअल फण्डका रुपमा ‘नबिल ब्यालेन्स फण्ड १’ जारी गरेकोमा यो उसको दोस्रो योजना हो।
यसैबीच ‘नबिल म्युचुअल फण्ड” तेस्रो योजना नेपाल धितोपत्र बोर्डमा दर्ता भएको जनाईएको छ।
प्रकाशित मितिः २०७३ भदौ २५
वि.सं.२०७३ भदौ २५ शनिवार १६:२९ मा प्रकाशित
