काठमाण्डौं । प्रधानमन्त्री पुष्पकमल दाहाल प्रचण्ड आउँदो ३० गते भारतको औपचारिक भ्रमणका लागि जाने भएपछि उनको प्राथमिकता परेका भ्रमण गतिविधिहरु सार्वजनिक भएका छन्।
प्रधानमन्त्री प्रचण्ड ३० गते दिल्ली उत्रिए लगत्तै नेपाली दुतावासको कार्यक्रममा सहभागी हुनेछन्। त्यहाँ उनले दुतावासले निम्त्याएका आगन्तुकसँग अन्तरक्रिया गर्नेछन्। त्यस्तै विदेशी पाहुनाहरुसँग पनि छलफल गर्नेछन्।
प्रचण्डले भारतीय प्रधानमन्त्री नरेन्द्र मोदी सहित भारतीय राष्ट्रपति प्रणव मुखर्जी लगायतसँग ३१ गते छलफल गर्नेछन्। सबै औपचारिक भेटघाट ३१ गते हुनेछ। प्रचण्ड १ गते भारतको हिमाञ्चल प्रदेश जाँदैछन्।
उनले त्यहाँ हाइड्रो प्रोजेक्टको अवलोकन गर्नेछन्। २ गते साँझ स्वेदश फर्कनु अघि प्रचण्डले पतञ्जली योगपिठको भ्रमण गर्नेछन्। योगपिठको जडिबुटी फ्याक्ट्री अवलोकन गर्ने कार्यक्रम प्रधानमन्त्रीको छ। त्यस्तै उनले केही भेटघाट र अन्तर्क्रिया पनि गर्ने कार्यक्रम रहेको छ।
प्रधानमन्त्री प्रचण्ड संविधान दिवसको ठिक अघिल्लो दिन असोज २ गते नेपाल फर्कने कार्यक्रम रहेको छ।
२६ भदौ २०७३, ३.००
वि.सं.२०७३ भदौ २६ आइतवार १५:२८ मा प्रकाशित