चितवन। बढी भाडा लिइ नारायणगढबाट काठमाडौँतर्फ जाँदै गरेका ३५ वटा माइक्रोबसबाट प्रत्येक यात्रुलाई १०० फिर्ता दिलाएर गन्तव्यतर्फ पठाएको छ ।
स्थानीय प्रहरी, प्रशासनले भरतपुरको आँपटारीमा सोमबार बिहानैबाट जाँच गर्दा काठमाडौँका लागि प्रतिव्यक्ति सामान्य सवारी साधनमा २७९ र डिलक्समा २० प्रतिशत थप गरी लिन पाउनेमा ती माइक्रोबसले प्रतिव्यक्ति ४५० असुल गरेको पाइईएपछि उक्त कारबाही गरिएको हो ।
जिल्ला प्रहरी कार्यालयका प्रमुख प्रहरी उपरीक्षक वसन्तबहादुर कुँवरका अनुसार नारायणगढबाट काठमाडौँ १४६ किलोमिटर पर्दछ । सो सडकका लागि यातायात मन्त्रालयले प्रतिव्यक्ति प्रतिकिमी एक रुपैयाँ ९० पैसा भाडादर तोकेको छ ।
डिलक्सले २० प्रतिशत थप गर्दासमेत ३३४ रुपैयाँ ८० पैसा लिन पाउँछ । तर माइक्रोबस र पर्यटक बसले यात्रुबाट ४५० देखि ६०० सम्म भाडा असुल गर्दै आएका छन् ।
नियन्त्रणमा लिएका माइक्रोबसलाई प्रतिव्यक्ति रु १०० फिर्ता गरी सबैलाई टिकट दिएर चलानीसहित गन्तव्यतर्फ पठाइएको उनले बताए ।
अटेर गरेर बढी भाडा लिनेलाई नियन्त्रणमा लिएर मुद्दासमेत चलाउने प्रमुख जिल्ला अधिकारी विनोदप्रकाश सिंहले बताए ।
प्रकाहित मितिः २०७३ भदौ २७
वि.सं.२०७३ भदौ २७ सोमवार १३:१२ मा प्रकाशित