काठमाडौं । ठमेल पर्यटन विकास परिषद्को असोज २ गते तोकिएको साधारणसभा रातारात स्थगित गरेको सूचना जारी गरी अध्यक्ष रामशरण थपलिया सम्पर्क विहिन भएका छन् । आफ्नो अनुकुल परिस्थिति नबनेपछि साधारण सभा हुने भनेर तोकिएको १२ घण्टा अगाडी सूचना टाँसेर स्थगित गरेको भन्दै थपलिया साधारण सभास्थलमा पुगेका छैनन् । थपलियाले स्थगित गरेपनि मल्ल होटलमा साधारणसभा जारी रहेको छ ।
परिषद्को कार्यसमिति बैठकले असोज २ गते आज साधारणसभा गर्ने निर्णय गरेपनि अप्ठेरो परिस्थिति सिर्जना भएको भन्दै स्थगित गरेको सूचना जारी गरेको थियो । हिजो शनिवार राति सूचना जारी गरि साधारणसभा स्थगित गरेको भन्दै केही सदस्यले आक्रोश समेत पोखेका छन् । साधारण सदस्यहरुले आज हुने भनिएको साधारणसभा स्थगितको सूचना हिजो राति जारी गरेर साधारणसभा स्थगित गर्न नसक्ने जनाएका छन् । उनीहरुले परिषद्को अपरिपक्व काम र व्यक्तिगत स्वार्थमा संस्थाले मनलाग्दी गरेको भन्दै आज साधारसभा हुने जनाएका छन् ।
यतिखेर साधारणसभा हुने भनिएको मल्ल होटलमा साधारणसदस्यहरुको भीड लागेको छ । अधिकांश सदस्यहरुले स्थगितको सूचना नपाएका कारण पुगेका छन् भने हालका अध्यक्ष थपलियाको कार्यशैली मन नपराउने सदस्यहरु पनि साधारणसभा स्थल पुगेका छन् । अध्यक्ष थपलियासहित कार्यसमितिका केही पदाधिकारीहरु साधारणसभामा उपस्थित नभएपछि बरिष्ठ उपाध्यक्ष समीर गुरुङले साधारणसभाको अध्यक्षता गरिरहेका छन् । उनीहरुले २१ औं र २२ औं साधारणसभा आजै गर्ने र नयाँ तदर्थ समिति समेत घोषणा गर्ने तयारी गरेको परिषद्का पूर्व अध्यक्ष तेजेन्द्रनाथ श्रेष्ठले बताए । श्रेष्ठले आज साधारणसभा भएपछि हालका अध्यक्ष थपलिया नेतृत्वको कार्यकालको समय समाप्त हुने भन्दै भोलीदेखि तदर्थ समितिले काम गर्ने बताए । उनले साधारणसभा सञ्चालन भइरहेकोले सबैल सदस्यहरुलाई उपस्थित भइदिन आग्रह पनि गरेका छन् ।
२ असोज २०७३
वि.सं.२०७३ असोज २ आइतवार ११:४५ मा प्रकाशित
