काठमाण्डौं । अमेरिकाको इन्डियाना राज्यमा एउटी ६० वर्षीय महिला पहिलोपल्ट आमा बनिन्। त्यो पनि उनले दुई वटा बच्चालाई एकैपल्ट जन्म दिएर।
क्लाइन्डेट कुक नाम गरेकी यी ६० वर्षीय महिलाले गत आइतबार जुम्ल्याह बच्चालाई जन्म दिएकी थिइन्। दुबै बच्चाको तौल ५ पाउन्ड भएको बताइएको छ। कुक दम्पत्ती गत वर्षदेखि आफ्नो परिवार बनाउने निस्कर्षमा पुगेका थिए।
यसका लागि उनीहरूले आइवीएफ विशेषज्ञको सल्लाह लिएका थिए। क्लाइन्डेटको उमेर ६० वर्षको भएको हुनाले चिकित्सकले उनलाई आमा बन्न प्रोत्साहित गर्ने कुरामा कमै विश्वास गरिएको थियो। तर, मेडिकल चेकअपपछि चिकित्सकको विशेषज्ञ टोलीले आमा बन्न उनलाई स्वीकृति प्रदान गरेको थियो।
क्लाइन्डेटका श्रीमान रोस कुकले आफ्नो पत्नी आमा बनेको विषयमा खुसी व्यक्त गर्दै भने, ‘पहिले आइज्याक(छोरा) जन्मियो। त्यसपछि आइज्याह जन्मिन्।’ उनले जुम्ल्याह बच्चा जन्माएपछि पत्नी क्लाइन्डेट खुसीले रुएको बताउन भुलेनन्। ‘मलाई रुन मन लाग्यो। त्यो क्षण निकै आनन्दको थियो,’ उनले भनिन्।
प्रकाशितः २०७३ असोज १८
वि.सं.२०७३ असोज १८ मंगलवार १६:२८ मा प्रकाशित